Salm a Davydh.

1Klew ow fysadow, A Arloedh,

ro skovarn dhe'm govynnadow;

gorthyp dhymm a-barth dha lelder ha'th ewnder.

2Na dhoro dha was dhe vreus,

rag y'th wolok jy ny vydh denvyth bew prevys gwiryon.

3Rag an eskar re helghyas ow enev;

ev re skwattyas ow bewnans dhe'n leur,

ev re wrug dhymm triga yn tewlder, kepar ha'n re yw marow seuladhydh.

4Rakhenna ow spyrys a glamderas ynnov,

ha'm kolonn a-bervedh ynnov a goedhas yn desper.

5My a berth kov a'n dydhyow koth;

my a breder a'th wriansow oll,

my a breder a oberow dha dhiwleuv.

6My a ystynn ow diwleuv dhiso;

ow enev a yeun war dha lergh kepar ha tiredh sygh. Sela.

7Fisten dhe worthybi dhymm, A Arloedh,

rag ow spyrys a fyll.

Na gudh dha fas ragov,

ma na viv kepar ha'n re a dhiyskynn dhe'n pytt.

8Gwra dhymm klewes dha dregeredh myttinweyth,

rag ynnos jy y trestyav.

Gwra dhymm godhvos an fordh y koedh dhymm kerdhes ynni,

rag dhiso jy y trehavav ow enev.

9Gwra ow delivra, A Arloedh, dhiworth ow eskerens;

dhiso jy y fiav rag skovva.

10Dysk dhymm gul dha vodh,

rag ty yw ow Duw.

Gwres dha Spyrys kuv ow hembronk

yn tir kompes.

11Bewha vy, A Arloedh, a-barth dha hanow;

a-barth dha ewnder doroy ow enev yn-mes a anken.

12Y'th tregeredh diswra ow eskerens,

ha distru oll an re a omladh erbynn ow enev;

rag dha was ov vy.