Salm a Davydh.

1Benniges re bo an Arloedh ow harrek,

neb a dhysk dhe'm diwleuv gwerrya, ha dhe'm bysies omladh;

2ow skons ha'm dinas,

ow thour ha'm delivrer,

ow skoes may trestyav ynno,

neb a feth an poblow yn-dannov.

3Arloedh, pyth yw den may kemmerri with anodho,

po mab-den may hwrylli vri anodho?

4Kepar hag anall yw den;

y dhydhyow a dremen avel skeus.

5Gwra dhe'th nevow plegya dhe'n dor, A Arloedh, ha diyskynn;

toch an menydhyow, ha megi a wrons.

6Dyllo dha lughes, ha'ga skattra;

tenn dha sethow, ha'ga domhwel.

7Ystynn dha leuv a'n ughelder;

gwra ow delivra, ha kemmer vy yn-mes a dhowrow meur,

yn-mes a leuv estrenyon.

8Aga ganow a lever euveredh,

ha'ga leuv dhyghow yw leuv dhyghow a falsuri.

9My a gan kan nowydh dhis, A Dhuw;

war delynn a dheg kordenn y kanav gormola dhis.

10Ty re ros budhogoleth dhe vyghternedh,

ha delivra Davydh dha was.

11Saw vy a beryll an kledha,

ha gwra ow delivra dhiworth leuv estrenyon;

aga ganow a lever euveredh,

ha'ga leuv dhyghow yw leuv dhyghow a falsuri.

12Re deffo agan mebyon

avel plansow yn aga yowynkneth,

ha'gan myrghes avel pennmeyn

kervys kepar hag yn palas.

13Re bo agan skiberyow leun,

ow ri boes a bub eghenn;

ha re dhineyttho agan deves milyow

ha degow a vilyow yn agan gwelyow.

14Re bo agan oghen krev rag ober,

ha na vo aswaow na divroa,

ha na vo kri a gynvann yn agan stretys.

15Gwynnvys an bobel yn studh a'n par na;

devri, gwynnvys an bobel ha dhedhi an Arloedh avel aga Duw.