Kan gormola a Davydh.

1My a'th ughelha, A Dhuw an Myghtern,

ha my a vennik dha hanow bys vykken ha bynnari.

2Pub dydh y'th vennigav,

ha gormel dha hanow bys vykken ha bynnari.

3Meur yw an Arloedh hag ev a dal bos gormelys yn fras,

ha ny yllir hwithra y veuredh.

4Unn henedh a wormel dha oberow dhe'n nessa,

ha derivas dha wriansow nerthek.

5My a breder a splannder gloryus dha veuredh,

ha'th oberow marthys.

6Ha tus a gews a nerth dha oberow euthyk;

my a dheriv dha veuredh.

7I a dhiskwa kovadh dha dhader hel,

ha kana yn lowen a'th ewnder.

8An Arloedh yw grassyes ha truedhek,

lent ow serri ha meur y dregeredh.

9An Arloedh yw da orth pub den oll,

hag yma y druedh dres oll y oberow.

10Oll dha oberow a'th wormel, A Arloedh,

ha'th syns a wra dha venniga.

11I a lever a wolewder dha wlaskor,

ha kewsel a'th nerth,

12rag may hwrellons dhe vebyon den aswonn y wriansow nerthek,

ha golewder meuredh y wlaskor.

13Dha wlaskor yw gwlaskor nevra a bes,

ha'th vestrynses a dhur a unn henedh dhe'n nessa.

An Arloedh yw len yn oll y eryow,

ha grassyes yn oll y oberow. 145:13 An ARLOEDH yw len yn oll y eryow, ha grassyes yn oll y oberow: Nyns usi an geryow ma y'n tekst masoretek, mes ymons y'n Syriek ha'n Vulgat, hag yn dornskrifow a'n Septuagint ha Qumran. An Salm ma yw akrostek, ha rakhenna kler yw an geryow ma dhe vos rann dherowel anodho.

14An Arloedh a skoedh oll an re yw koedhys,

hag ev a dhrehav oll an re yw plegys dhe'n dor.

15Dewlagas pub den a wayt warnas,

ha ty a re dhedha aga boes y'n prys gwiw.

16Ty a iger dha leuv,

ha kollenwel hwans pup-tra bew.

17An Arloedh yw gwiryon yn oll y fordhow,

ha len yn oll y wriansow.

18Yma an Arloedh ogas dhe bubonan a elow warnodho,

dhe bubonan a elow warnodho yn gwiryonedh.

19Ev a gollenow bodh an re a berth own anodho,

hag ev a glew aga kri, hag ev a's selow.

20An Arloedh a with pubonan a'n kar;

mes oll an debeles a wra ev dhe dhistrui.

21Ow ganow a lever gormola an Arloedh,

ha gwres pub kig benniga y hanow sans bys vykken ha bynnari.