1Gormelewgh an Arloedh,

rag da yw kana gormola dh'agan Duw ni;

plegadow ha gwiw yw y wormel.

2An Arloedh a dhrehav Yerusalem;

ev a guntell war-barth divresow Ysrael.

3Ev a yaghha an re trogh aga holonn,

ha kelmi aga goliow.

4Ev a amont niver an ster,

ev a re henwyn dhe bubonan anedha.

5Meur yw agan Arloedh, ha meur yw y nerth;

heb fin yw y gonvedhes.

6An Arloedh a skoedh an re hwar,

hag a iselha an debeles dhe'n leur.

7Kenewgh dhe'n Arloedh gans grasyans;

kenewgh gormola war an sowtri dh'agan Duw;

8Neb a gudh an nevow gans kommol,

ha darbari glaw rag an nor,

ha gul dhe wels tevi war an menydhyow.

9Ev a re dhe'n gwarthek aga boes,

ha dhe ydhnigow an varghvran pan elwons.

10Nyns eus ganso delit yn nerth an margh,

ha ny gemmer ev plesour yn diwarr gour.

11Mes an Arloedh a gemmer plesour y'n re a'n own,

y'n re a fydh yn y dregeredh.

12Gormel an Arloedh, A Yerusalem,

gormel dha Dhuw, A Sion.

13Rag ev re grevhas barrys dha borthow;

ev re vennigas dha fleghes a-bervedh ynnos.

14Ev a wra kres y'th oryon;

ev a'th lenow a waneth a'n gwella.

15Ev a dhyllo y worhemmynn war an nor;

resek a wra y lavar pur uskis.

16Ev a re ergh avel gwlan;

ev a les loesrew avel lusu.

17Ev a skoell yey avel brewyon;

piw a yll sevel a-rag y yeynder?

18Ev a dhyllo y lavar ha'ga theudhi;

ev a wra dh'y wyns hwytha, ha'n dowrow a dhewrak.

19Ev a dhiskwa y er dhe Yakob,

y ordenansow ha'y vreusow dhe Ysrael.

20Ny dhyghtyas kenedhel nahen yndellma,

ha'y vreusow, ny's aswonnons.

Gormelewgh an Arloedh.