1Gormelewgh an Arloedh.

Gormelewgh an Arloedh dhiworth an nevow;

gormelewgh ev y'n ughelderyow.

2Gormelewgh ev, oll hwi y eledh ev;

gormelewgh ev, oll y luyow.

3Gormelewgh ev, howl ha loer;

gormelewgh ev, oll hwi ster ow splanna.

4Gormelewgh ev, hwi nevow a nevow,

ha hwi dhowrow usi a-ugh an nevow.

5Gormelens i hanow an Arloedh,

rag ev a worhemmynnis hag y fons i formys.

6Ev re's fastyas bys vykken ha bynnari;

ordenans re ros, ha ny vydh terrys.

7Gormelewgh an Arloedh dhiworth an nor,

hwi dhragones ha downderyow oll;

8tan ha keser, ergh ha niwlrew;

gwyns hag annawel ow kewera y er;

9menydhyow ha brennow oll,

gwydh leun a frut ha kederwydh oll;

10miles ha gwarthek oll,

kreaturs ow slynkya hag ydhyn askellek.

11Myghternedh an nor ha poblow oll,

pennsevigyon hag oll breusysi a'n norvys;

12gwer yowynk ha maghtethyon,

tus hen ha yowynk war-barth.

13Gormelens hanow an Arloedh,

rag unnsel y hanow ev yw ughelhes,

hag yma y splannder a-ugh nev ha nor.

14Ev re dhrehevis korn rag y bobel,

gormel rag oll y syns,

rag mebyon Ysrael, pobel eus ogas dhodho.

Gormelewgh an Arloedh.