Miktam a Davydh.

1Gwith vy, A Dhuw, rag ynnos jy y hwilav skovva.

2My re leveris dhe'n Arloedh ‘Ty yw ow Arloedh,

nyns eus genev travyth da a-der ty.’

3A-barth an syns usi y'n vro, ha'n re vryntin,

yma oll ow lowena ynna i.

4Aga galarow a voghha, seul a fysk war-lergh duw arall;

ny offrynnav goes aga offrynnow-diwes,

ha ny gemmerav aga henwyn y'm diwweus.

5An Arloedh yw ow rann dhewisys ha'm hanaf;

ty a syns ow hevrenn.

6An rann re goedhas ragov yn tylleryow teg;

devri yma dhymm ertach splann.

7My a vennik an Arloedh, neb a ros dhymm kusul;

devri ow lonethi a'm kesk yn termyn nos.

8My re worras an Arloedh prest a-dheragov;

drefenn y vos ev a'm leuv dhyghow, ny drebuchyav.

9Rakhenna heudhik yw ow holonn, ha'm enev a lowenha,

ha'm kig ynwedh a drig yn sawder.

10Rag ny vynnydh gasa ow enev yn ifarn,

na ri dha Sans dhe weles an pytt.

11Ty a dhiskwa dhymm an fordh a vewnans;

y'th wolok jy yma lanwes lowena,

y'th leuv dhyghow yma joy nevra a bes.