Dhe vester an keur. Salm a Davydh, gwas an Arloedh, a leveris geryow an gan ma dhe'n Arloedh y'n jydh ma'n selwis an Arloedh dhiworth leuv y eskerens oll, ha dhiworth Sowl; hag ev a leveris:

1My a'th kar, A Arloedh, ow nerth;

2an Arloedh yw ow harrek, ha'm kastell, ha'm delivrer;

ow Duw, ow harrek krev may hwilav skovva ynno,

ow skoes, ha korn ow selwyans, ow dinas.

3My a elow war an Arloedh, neb yw gwiw dhe vos gormelys,

ha my a vydh selwys a'm eskerens.

4Yth esa kerdyn ankow a-dro dhymm,

ha frosow sherewynsi a wrug euth dhymm;

5yth esa kerdyn ifarn a-dro dhymm;

yth esa antylli ankow a-dheragov.

6Y'm anken my a elwis war an Arloedh,

ha dhe'm Duw y kriis vy rag gweres.

Ev a glewas ow lev yn-mes a'n tempel,

ha'm kri a-dheragdho a dheuth bys yn y dhiwskovarn.

7Ena an nor a grenas ha kryghylli;

ha selyow an menydhyow a grysyas

ha krena, rag y vos serrys.

8Mog a yskynnas mes a'y dhewfrik,

ha tan a'y anow, ow tevorya;

kolennow a dardhas yn flammow a-dhiworto.

9Hag ev a blegyas an nevow, hag a dheuth yn-nans;

hag yth esa tewolgow yn-dann y dreys.

10Hag ev a varghogas war jerub ha nija;

ev a nijas uskis war eskelli an gwyns.

11Ev a wrug tewlder y gudhans, y babell a-dro dhodho,

kommol tew a dhowr y'n ebron.

12Dhiworth an golewder a-ragdho

y gommol a dremenas,

keser ha kolennow tan.

13An Arloedh ynwedh a darennas y'n nevow,

ha'n Ughella18:13 ha'n Ughella: Ebrow Elyon. a ros y lev,

keser ha kolennow tan.18:13 keser ha kolennow tan: Nyns usi an geryow ma y'n Septuagint, nag yn 2 Samuel 22:14.

14Ev a dhellos y sethow ha skattra y eskerens,18:14 ha skattra y eskerens: Ebrow ha'ga skattra.

lughesennow pals, ha'ga gorra yn deray.

15Ena yth omdhiskwedhas goverow dowr,18:15 goverow dowr: Po amendyans war-lergh 2 Sam 22:15 leuryow an mor.

ha selyow an norvys a veu diskudhys,

orth dha geredh, A Arloedh,

orth hwyth anall dha dhewfrik.

16Ev a dhannvonas dhiworth an ughelder ha'm kemmeres,

ev a'm tennas mes a dhowrow pals.

17Ev a'm delivras dhiworth ow eskar galloesek,

ha dhiworth an re a'm kas;

rag yth ens i re grev ragov.

18I a dheuth er ow fynn yn dydh ow therroesa;

mes an Arloedh re beu skoedhyans dhymm.

19Ev a'm dros yn-mes dhe dyller ledan;

ev a'm delivras, drefenn bos dhodho delit ynnov.

20An Arloedh re wrug dhymm herwydh ow ewnder;

herwydh glander ow diwleuv yth attylis ev dhymm.

21Rag my re synsis fordhow an Arloedh,

ha ny dhiberthis yn trog dhiworth ow Duw.

22Rag yth esa oll y vreusow ev a-dheragov,

ha ny dreylys vy y ordenansow dhiworthiv.

23Hag yth en vy divlam a-dheragdho,

ha my a omwithas dhiworth ow hammweyth.

24Rakhenna an Arloedh re attylis dhymm herwydh ow ewnder,

herwydh glander ow diwleuv yn y wolok ev.

25Gans an den tregeredhus ty a vydh tregeredhus;

gans an gour divlam ty a vydh divlam.

26Gans an den glan ty a vydh glan;

ha gans an den kamm ty a vydh gorth.

27Rag ty a selow an bobel uvel;

mes ty a dhre dhe'n dor an dhewlagas woethus.

28Rag ty a enow ow lugarn;

an Arloedh ow Duw a wra dhe'm tewlder splanna.

29Rag dredhos my a yll poenya erbynn lu;

ha der ow Duw my a yll lemmel dres fos.

30Duw yw divlam y fordh;

lavar an Arloedh yw prevys;

skoes yw dhe seul a hwila skovva ynno.

31Rag piw yw Duw marnas an Arloedh?

Ha piw yw karrek saw agan Duw ni? –

32an Duw neb a worr grogys a nerth a-dro dhymm,

hag ev re wrug ow fordh divlam.

33Ev a wra ow threys kepar ha treys ewigow,

ha'm settya fyrv war dylleryow ughel.

34Ev a dhysk dhe'm diwleuv gwerrya,

ha'm diwvregh a yll plegya gwarak a vrons.

35Ha ty re ros dhymm skoes dha selwyans,

dha leuv dhyghow a'm menten,

ha'th weres re'm meurhas.

36Ty a ros spas ledan rag ow hammow yn-dannov,

ma na drebuchyas ow dewufern.

37My a helgh ow eskerens ha'ga hachya;

ha ny dhehwelav bys pan vons distruys.

38My a's brew ma na allons sevel;

i a goedh yn-dann ow threys.

39Rag ty re worras grogys a nerth a-dro dhymm rag an gas;

ty re worras yn-dannov an re a sevis er ow fynn.

40Ty re ros dhymm gwarrow ow eskerens,

may hallen vy distrui an re a'm kas.

41I a grias, mes nyns esa nagonan dh'aga selwel,

war an Arloedh, mes ny worthybis dhedha.

42My a's brew munys avel doust a-dherag an gwyns;

my a's trett yn-dann dreys avel leys an stretys.

43Ty re'm delivras dhiworth strifow an bobel,

ha'm gorra yn penn an kenedhlow;

pobel na aswonnis vy a wra ow servya.

44Kettell glewons ahanav, gostydh yns i dhymm;

estrenyon a ombleg dhymm.

45Estrenyon a gemmer digolonn,

i a dheu ow krena yn-mes a'ga heryow.

46An Arloedh a vew, ha benniges re bo ow harrek,

ha bedhes Duw ow selwyans ughelhes,

47an Duw neb a re dhymm dial

hag a worr poblow yn-dannov,

48neb a'm delirv dhiworth ow eskerens,

ha'm drehevel a-ugh an re a sev er ow fynn;

ty a'm delirv dhiworth an gour garow.

49Rakhenna my a'th wormel, A Arloedh, yn mysk an kenedhlow,

ha kana gormola dhe'th hanow.

50Ev a re selwyans meur dh'y vyghtern,

hag a wra tregeredh dh'y Untys,

dhe Davydh ha dh'y has bys vykken.