1Prag y hwra an kenedhlow deray,

ha'n poblow devisya taklow euver?

2Myghternedh an norvys a sev,

ha'n rewloryon a omgusul war-barth,

erbynn an Arloedh hag erbynn y Untys:

3‘Terryn ni aga rawyow dhe demmyn,

ha tewlel aga herdyn dhiworthyn.’

4Neb a esedh y'n nevow a hwerth;

an Arloedh a wra ges anedha.

5Ena ev a gews orta yn y sorr,

ha'ga broweghi yn y gonnar:

6‘My re worras ow myghtern war Sion, ow menydh sans.’

7My a dheriv ordenans an Arloedh;

ev a leveris dhymm, ‘Ty yw ow mab,

hedhyw my re'th tineythis.

8Govynn orthiv, ha my a re dhis an kenedhlow y'th ertach,

ha pennow pella an nor y'th perghennogeth.

9Ty a's terr gans gwelenn horn;

ty a's brew dhe demmyn avel lester gweythor pri.’

10Ytho bedhewgh fur lemmyn, hwi vyghternedh;

gwrewgh vri a'n gwarnyans ma, hwi vreusysi an norvys.

11Servyewgh an Arloedh gans own,

ha lowenhewgh gans krena.

12Ymmewgh dhe'n mab, ma na vo serrys,

ha na yllowgh dhe goll y'n fordh;

rag y sorr a flamm yn skon.

Gwynnvys oll an re a hwila skovva ynno ev.