Dhe vester an keur: war Ayyeleth ha-Shahar. Salm a Davydh.

1Ow Duw, ow Duw, prag y'm gessys?

Prag yth es'ta mar bell dhiworth ow selwyans, ha dhiworth geryow ow hynvann?

2Ow Duw, my a arm dydhweyth, ha ny worthybydh;

nosweyth ynwedh, ha ny dawav vy.

3Mes ty yw sans,

prest ow triga yn gologhas Ysrael.

4Agan tasow a drestyas ynnos jy;

i a drestyas, ha ty a's delivras.

5I a grias warnas, ha delivrys vons;

i a drestyas ynnos, ha ny vons toellys.

6Ha my, pryv ov vy, a-der gour;

skorn mab-den, ha dispresys gans an bobel.

7Seul a'm gwel a wra ges ahanav,

i a gamm aga min ha shakya an penn.

8‘Trest y'n Arloedh ma'n deliffro.

Gwres ev y dhelivra, rag ev a'n jeves delit ynno.’

9Mes ty yw neb a'm kemmeras mes a'n brys;

ty a'm gwithas saw war dhiwvronn ow mamm.

10Tewlys en vy warnas a-dhiworth an brys,

ty yw ow Duw a-dhiworth torr ow mamm.

11Na vydh pell dhiworthiv,

rag anken a dheu yn ogas

ha nyns eus neb a weresso.

12Terewi pals re dheuth y'm kyrghynn,

terewi krev a Bashan a omsett a-dro dhymm;

13i a iger aga ganow a-les er ow fynn,

kepar ha lew ow skwardya hag owth usa.

14Skoellys ov vy avel dowr,

ha'm eskern oll yw diskevelsys,

ow holonn yw kepar ha koer;

teudhys yw yn mysk ow holodhyon.

15Ow nerth yw desyghys avel darn a briweyth,

ha'm taves a len orth ow grudh;

ha ty a'm gorr yn doust ankow.

16Rag keun re dheuth a-dro dhymm;

kuntelles an debeles re'm keas;

i re wanas ow diwleuv ha'm treys.

17My a yll nivera ow eskern oll;

i a lagatt hag a vir orthiv.

18I a rann ow dillas yntredha,

war ow gwisk i a dewl prenn.

19Mes na vydh pell dhiworthiv, A Arloedh;

ow nerth, deus uskis dhe'm gweres.

20Delirv ow enev dhiworth an kledha,

ow bewnans dhiworth maystri an ki.

21Salw vy a anow an lew,

rag ty re'm gorthybis yn-mes a gern an oghen gwyls.

22My a dheriv dha hanow dhe'm breder;

yn mysk an kuntelles my a'th wormel.

23Hwi neb a berth own a'n Arloedh, gormelewgh ev!

Hwi oll, has Yakob, gordhyewgh ev,

ha hwi oll, has Ysrael, perthewgh euth anodho

24Rag ny dhispresyas ev nag aborrya

anken an den truan;

ha ny gudhas y fas ragdho,

mes pan grias warnodho ev a'n klewas.

25Ahanas jy yw ow gormola y'n kuntelles meur;

my a dal ow ambosow a-wel dhe'n re a berth own ahanas

26An dus truan a dheber hag a vydh lenwys;

an re a hwila an Arloedh a'n gormel;

re vewo agas kolonn bynnari.

27Oll pennow an norvys a berth kov

ha treylya dhe'n Arloedh;

hag oll teyluyow an kenedhlow

a wordh a-dheragos.

28Rag yma an myghternsys dhe'n Arloedh;

hag ev yw an rewler yn mysk an kenedhlow.

29Oll an vrasyon war an nor a dheber ha gordhya;

oll an re a dhiyskynn dhe'n doust a ombleg a-dheragdho,

ha ny yll denvyth bewhe y enev y honan.

30Linyeth a'n serv;

tus a re derivas a'n Arloedh dhe'n henedh a dheu.

31I a dheu, ha derivas y ewnder dhe bobel a vydh genys,

ev dhe vos neb a wrug hemma.