Salm a Davydh.

1Dhiso jy, A Arloedh, y trehavav ow enev.

2Ow Duw, my a drest ynnos jy,

na as vy dhe berthi meth;

na vedhes ow eskerens heudhik a'm govis.

3Sur na berthes meth an re a drest ynnos jy;

perthes meth an re a wra falsuri heb ken.

4Diskwa dhymm dha fordhow, A Arloedh;

dysk dhymm dha hynsyow.

5Hembronk vy y'th wirder, ha dysk dhymmo vy,

rag ty yw Duw ow selwyans;

ynnos jy y trestyav oll an jydh.

6Porth kov, A Arloedh, a'th truedh ha'th tregeredh,

rag i re beu yn few trank heb worfenn.

7Na borth kov a beghosow ow yowynkneth, na'm kammweyth;

herwydh dha dregeredh porth kov ahanav,

A Arloedh, a-barth dha dhader.

8Da hag ewn yw an Arloedh;

rakhenna ev a dhysk dhe beghadoryon y'n fordh.

9Ev a hembronk an re uvel yn gwirvreus,

hag ev a dhysk y fordh dhe'n voghosogyon.

10Oll hynsyow an Arloedh yw tregeredh ha gwirder,

dhe'n re a with y gevambos ha'y dhustuniow.

11A-barth dha hanow, A Arloedh,

gav dhymm ow hammweyth, rag meur yw.

12Py den yw ev neb a berth own a'n Arloedh?

Ev a dhysk dhodho y'n fordh a dhewis ev.

13Y enev a drig yn sewenyans,

ha'y has a erit an tir.

14Yma kevrin an Arloedh gans an re a berth own anodho,

hag ev a dhiskwa dhedha y gevambos.

15Prest yma ow dewlagas war an Arloedh,

hag ev a dhre ow threys yn-mes a'n roes.

16Treyl dhymmo vy, ha bydh grassyes orthiv;

rag digoweth ha boghosek ov vy.

17Ankenyow ow holonn yw meur aga niver,

tenn vy yn-mes a'm ankres.

18Mir orth ow anken ha'm poenvos,

ha gav oll ow feghosow.

19Mir orth ow eskerens, rag meur yw aga niver,

ha gans kas fell i a'm kas.

20Gwith ow enev ha gwra ow delivra;

na as vy dhe berthi meth, rag my a hwila skovva ynnos jy.

21Re'm gwittho perfydhder ha gwiryonsys,

rag my a hwila skovva ynnos jy.

22Daspren Ysrael, A Dhuw,

yn-mes a'y ankenyow oll.