Salm a Davydh.

1Warnas jy y halwav, A Arloedh;

ow harrek, na vydh bodhar orthiv vy,

ma na viv, mar tewydh,

kepar ha'n re a dhiyskynn dhe'n pytt.

2Klew lev ow govynnadow,

pan griav dhis rag gweres,

pan dhrehavav ow diwleuv

troha'th tempel sans.

3Na'm kemmer vy dhe-ves gans an debeles

na gans an dhrogoberoryon,

neb a lever kres gans aga hynsa,

ha dregynn yn aga holonn.

4Ro dhedha i herwydh aga ober,

ha herwydh sherewneth aga gwriansow;

ro dhedha i herwydh ober aga diwleuv;

attal dhedha aga gober gwiw.

5Rag ny wrons vri a wriansow an Arloedh,

na ober y dhiw­leuv,

ev a's tewl dhe'n dor, ha ny's drehav.

6Benniges re bo an Arloedh,

rag ev re glewas lev ow govynnadow.

7An Arloedh yw ow nerth ha'm skoes;

ow holonn re drestyas ynno ev,

ha gweresys ov vy, ytho ow holonn a lowenha yn feur,

ha gans ow han my a'n gormel.

8An Arloedh yw nerth y bobel,

hag ev yw skovva selwyans y Untys.

9Salw dha bobel, ha bennik dha ertach;

bydh aga bugel, ha'ga drehevel bynitha.