Salm a Davydh.

1Rewgh dhe'n Arloedh, hwi vebyon Duw,

rewgh dhe'n Arloedh gordhyans ha nerth.

2Rewgh dhe'n Arloedh an gordhyans a dhegoedh dh'y hanow;

gordhyewgh an Arloedh yn tekter sansoleth.

3Yma lev an Arloedh war an dowrow;

an Duw a wolewder a wra taran;

yma an Arloedh war an dowrow meur.

4Lev an Arloedh yw galloesek,

lev an Arloedh yw leun a splannder.

5Lev an Arloedh a derr an kederwydh,

ha'n Arloedh a derr kederwydh Lebanon

6Hag ev a wra dhedha terlemmel avel leugh,

Lebanon ha Siryon avel ojyon gwyls yowynk.

7Lev an Arloedh a rann flammow tan;

8lev an Arloedh a wra dhe'n difeyth krena,

an Arloedh a wra dhe dhifeyth Kadesh krena.

9Lev an Arloedh a wra dhe'n derow krena,

hag a lommha an koesow;

hag yn y dempel pubonan a gews a'y wolewder.

10An Arloedh a esedh yn y se war an liv;

ha'n Arloedh a esedh avel Myghtern bys vykken.

11An Arloedh a re nerth dh'y bobel;

an Arloedh a vennik y bobel gans kres.