Salm a Davydh. Maskil.

1Gwynnvys neb yw gevys y gammweyth,

ha neb yw kudhys y beghes.

2Gwynnvys an den na reken an Arloedh kammweyth dhodho,

ha nag eus falsuri yn y spyrys.

3Pan dewis vy heb aswonn ow feghes, ow eskern a wedhras,

ha my owth hanasa oll an jydh.

4Rag dydhweyth ha nosweyth poes o dha leuv warnav;

ow sugen o treylys kepar hag yn syghor hav. Sela.

5My a aswonnis ow feghes dhiso jy,

ha ny gudhis ow hammweyth.

My a leveris, ‘My a yes ow hammweyth dhe'n Arloedh’;

ha ty a avas kabel ow feghes. Sela.

6Rakhenna y hwra pubonan yw glan

pysi warnas jy,

yn prys may hyllir dha gavoes, devri yn liv an dowrow meur,

ny dhons ogas dhodho.

7Ty yw ow hovva,

ty a'm gwith rag anken;

ty a dheu a-dro dhymm gans kanow livreson. Sela.

8My a'th kevarwoedh, ha dyski dhis an fordh mayth yw res dhis mos;

ha gans ow lagas warnas my a'th kusul.

9Na vedhewgh kepar ha'n margh na'n mul, heb konvedhes,

res yw dhedha bos synsys gans genva ha fronn,

ma na dheffons ogas dhis.

10Galarow pals a vydh dhe'n tebelwas,

mes neb a drest y'n Arloedh, tregeredh a dheu a-dro dhodho.

11Lowenhewgh y'n Arloedh, ha bedhewgh heudhik, hwi an re wiryon,

germewgh yn lowen, oll hwi yw ewnhynsek agas kolonn.