Salm a Davydh, pan omwul bos mus a-dherag Abimelek, ma'n tewlis ev mes, hag ev eth alena.

1My a vennik an Arloedh pup-prys;

y wormola a vydh prest y'm ganow.

2Ow enev a wra y vost y'n Arloedh;

an re hwar a glew anodho, ha lowenhe.

3Meurhewgh an Arloedh genev vy,

hag ughelhyn ni y hanow war-barth.

4My a hwilas an Arloedh, hag ev a worthybis dhymm,

ha'm delivra dhiworth pup-tra a borthav own anodho.

5Mirewgh orto ha dewynnewgh gans joy;

ena ny wra agas fasow perthi meth.

6An den truan ma a elwis, ha'n Arloedh a glewas,

ha'y sawya a'y ankenyow oll.

7El an Arloedh a gamp a-dro dhe'n re a berth own anodho

hag ev a's delirv.

8Gwrewgh tastya ha gweles an Arloedh dhe vos da;

gwynnvys an den a hwila skovva ynno ev.

9Perthewgh own a'n Arloedh, hwi y syns ev,

rag ny fyll travyth dhe'n re a berth own anodho.

10An lewyon yowynk yw yn esow hag i a berth nown,

mes ny fyll travyth dha dhe'n re a hwila an Arloedh.

11Dewgh, hwi fleghes, goslowewgh orthiv;

my a dhysk dhywgh own an Arloedh.

12Py den eus neb yw hwansek dhe vewnans,

hag a vynn dydhyow pals rag may hwello da?

13Gwith dha daves rag drog,

ha'th tiwweus rag leverel falsuri.

14Treyl dhiworth drog, ha gwra da;

hwila kres, ha'y helghya.

15Yma dewlagas an Arloedh war an re wiryon,

ha'y dhiwskovarn troha'ga kri.

16Yma fas an Arloedh erbynn an re a wra drog,

dhe gisya aga hovadh dhiworth an norvys.

17An re wiryon a arm, ha'n Arloedh a glew,

ha'ga delivra dhiworth aga ankenyow oll.

18Yma an Arloedh ogas dhe'n re trogh aga holonn,

hag ev a selow an re keudhesik aga spyrys.

19Meur yw ankenyow an den gwiryon,

mes an Arloedh a'n delirv dhiworta oll.

20Ev a syns y eskern oll;

nyns yw onan anedha brewys.

21Droktra a ladh an tebelwas,

ha'n re a gas an den gwiryon a vydh kessydhys.

22An Arloedh a dhaspren enev y wesyon;

ha ny vydh kessydhys denvyth a'n re a hwila skovva ynno ev.