Salm a Davydh.

1Na sorr drefenn an dhrogoberoryon;

ha na borth avi orth an re a wra sherewneth.

2Rag avel gwels i a wedher yn skon,

ha krina avel losow gwyrdh.

3Trest y'n Arloedh ha gwra da;

trig y'n tir, ha bedhes diogeledh yn dha beurva.

4Lowenha y'n Arloedh,

hag ev a re dhis govynnadow dha golonn.

5Kommytt dha fordh dhe'n Arloedh;

trest ynno, hag ev a'n gwra.

6Ev a wra dhe'th ewnder splanna avel golow,

ha'th wirvreus avel hanter-dydh.

7Bydh kosel a-dherag an Arloedh, ha gwra y wortos gans perthyans;

na sorr drefenn an den a sewen yn y fordh,

drefenn an gour a ober droktowlow.

8Treyl dhiworth sorr, ha gas koler;

na vrogh, ma na wrylli drogober.

9Rag drogoberoryon a vydh treghys dhe-ves,

mes an re a drest y'n Arloedh, i a erit an tir.

10Hwath pols byghan ha ny vydh an tebelwas namoy;

ty a vir orth y dyller, ha ny vydh ev ena.

11Mes an re hwar a erit an tir,

hag i a gemmer plesour yn kres leun.

12An tebelwas a dewl towl erbynn an den gwiryon,

ha deskerni y dhyns orto.

13An Arloedh a hwerth orto,

rag ev a wel y dhydh ow tos.

14An debeles re dennas an kledha ha plegya aga gwarak,

dhe dhisevel an den truan ha'n boghosek,

dhe ladha an re ewn aga fordh.

15Aga kledha a dheu yn aga holonn i,

ha'ga gwaregow a vydh terrys.

16Gwell yw an boghes usi gans an den gwiryon

ages an rychys a debeles pals.

17Rag breghow an debeles a vydh terrys,

mes an Arloedh a venten an re wiryon.

18An Arloedh a aswonn dydhyow an re dhivlam,

ha'ga ertach a dhur bys vykken.

19Ny berthons meth yn droktermyn,

hag yn dydhyow esow i a vydh lenwys.

20Mes an debeles a dhe goll;

hag eskerens an Arloedh a vydh avel splannder an peurvaow;

i a dremen, yn mog y tremenons i.

21An tebelwas a gyv kendon ha ny attal,

mes an den gwiryon yw grassyes ha hel.

22Rag an re bennigys ganso a erit an tir,

ha'n re milligys ganso a vydh treghys dhe-ves.

23Kammow gour yw fastys gans an Arloedh,

hag ev a gemmer plesour yn y fordh.

24Kyn koettho, ny vydh ev tewlys sket dhe-ves,

rag an Arloedh a'n menten gans y leuv.

25Yowynk veuv, lemmyn koth ov vy,

mes bythkweth ny welis an den gwiryon gesys,

na'y has ow peggya bara.

26Oll an jydh ev yw grassyes hag a re kendon,

hag yma bennath war y has.

27Treyl dhiworth drog ha gwra da;

ha trig y'n tir bys vykken.

28Rag an Arloedh a gar gwirvreus,

ha ny as y syns.

Gwithys yns i bynitha,

mes has an debeles a vydh treghys dhe-ves.

29An re wiryon a erit an ti,

ha triga ynno bys vykken.

30Ganow an den gwiryon a lever furneth,

ha'y daves a gews a wirvreus.

31Yma lagha y Dhuw yn y golonn;

ny drebuch y gammow.

32An tebelwas a aspi an den gwiryon,

hag ev a assay y ladha.

33Ny wra an Arloedh y asa yn y leuv,

ha ny re ev drogvreus er y bynn pan yw breusys.

34Trest y'n Arloedh, ha syns y fordh ev,

hag ev a'th ughelha dhe erita an tir;

pan vo an debeles treghys dhe-ves, ty a'n wel.

35My re welas an tebelwas didruedh,

hag ev ow klasa avel baywydhenn las.37:35 avel baywydhenn las: War-lergh an Septuagint avel kederwydh Lebanon.

36Mes my a dremenas hag otta, nyns esa ol anodho;

my a'n hwilas, ha nyns o kevys.

37Merk an den divlam, ha mir orth an den ewnhynsek,

rag yma henedh dhe'n den a gres.

38Mes an dhrogoberoryon a vydh distruys war-barth;

henedh an debeles a vydh treghys dhe-ves.

39Yma selwyans dhe'n re wiryon dhiworth an Arloedh,

aga skovva yn termyn anken.

40Ha'n Arloedh a weres dhedha, ha'ga difres;

ev a's difres a'n debeles, ha'ga selwel,

rag i a hwila skovva ynno.