Salm a Davydh, rag kovadh.

1A Arloedh, na rebuk vy y'th sorr,

ha na geredh vy y'th konnar.

2Rag dha sethow re'm dewanas,

ha'th leuv re dheuth yn-nans warnav.

3Nyns eus yeghes y'm kig

drefenn dha sorr;

ha nyns eus kres y'm eskern

drefenn ow feghes.

4Rag ow hammweythresow res eth dres ow fenn,

yth yns i avel begh re boes ragov.

5Ow goliow yw flerys ha podredhek

drefenn ow follneth.

6Kromm ov vy ha plegys glan dhe'n dor;

oll an jydh yth esov ow kyni.

7Rag ow diwglun yw leun a gleves kasadow,

ha nyns eus yeghes y'm kig.

8Difredh ov vy ha brewys dres eghenn;

my re hanasas drefenn ankres ow holonn.

9A Arloedh, yma oll ow yeunes a-dheragos;

ha nyns yw ow hanas kudhys ragos.

10Ow holonn a lemm, ow nerth re'm gasas;

ha golow ow dewlagas ynwedh a fyll dhymm.

11Ow haroryon ha'm kowetha a gildenn dhiworth ow fla,

ha'm neshevin a sev a-bell.

12Ha'n re a hwila ow enev a worr maglennow;

ha'n re a vynn ow fystiga a gews a wodrosow,

ow prederi falsuri oll an jydh.

13Mes my yw avel bodhar, ny glewav;

hag avel avlavar na iger y anow.

14Hag yth ov vy avel den na glew,

ha nag eus gorthyp yn y anow.

15Rag ynnos jy, A Arloedh, y trestyav;

ty a worthyp dhymm, A Arloedh ow Duw.

16Rag my a leveris, ‘Na lowenhens i er ow fynn,

na vostyens warnav pan drebuch ow throes.’

17Rag parys ov vy dhe drebuchya,

hag yma ow galar prest a-dheragov.

18Rag my a avow ow hammweyth;

troblys ov drefenn ow fegh.

19Mes bew ha nerthek yw ow eskerens,

ha meur yw niver an re a'm kas yn fals.

20Ha'n re a attal drog rag da

yw ow eskerens rag my a hol dader.

21Na as vy, A Arloedh;

A Dhuw, na vydh pell dhiworthiv.

22Deus uskis dhe'm gweres,

A Arloedh ow selwyans.