Dhe vester an keur: war Yeduthun, Salm a Davydh.

1Yn-medhav, ‘My a with ow fordhow

rag na begghiv gans ow thaves;

my a with ow ganow gans fronn

hedre vo an tebelwas y'm gwel.’

2Avlavar en vy, ow tewel;

kosel en vy, heb hebaska.

Ow galar a wethhas;

3toemm o ow holonn ynnov vy;

ha my ow prederi, an tan a dhewis,

ha my a gewsis gans ow thaves:

4‘Arloedh, gwra dhymm godhvos ow diwedh,

ha pyth yw musur ow dydhyow;

may hwodhviv hirder ow bewnans.

5Otta, ty re wrug ow dydhyow avel nebes dornvedhi,

ha'm oes yw avel travyth a-dheragos;

yn hwir, pub den a sev avel anall. Sela.

6Rag den a gerdh avel skeus;

yn hwir ev yw troblys yn euver;

ev a wra bern a rychys ha ny woer piw a'n kuntell.

7‘Ha lemmyn, A Arloedh, pyth yw ow govenek?

Ynnos jy yma ow fydhyans.

8Gwra ow delivra dhiworth ow hammwriansow oll.

Na wra dhymm bos skorn an den foll.

9Avlavar en vy, ny igeris vy ow ganow,

rag ty yw neb a wrug hemma.

10Kemmer dha strekys dhiworthiv;

dre voemmenn dha leuv yth av vy dhe goll.

11‘Pan geredhydh den,

ow kessydhya kammweyth,

ty a wra dh'y dekter teudhi dhe-ves kepar dell wra an goedhan;

yn hwir, anall yw pub den. Sela.

12‘Klew ow fysadow, A Arloedh,

ha ro skovarn dhe'm kri;

na vydh tawesek orth ow dagrow.

Rag alyon ov vy genes,

godriger, avel ow thasow oll.

13Mir dhe-ves dhiworthiv, may fiv kennerthys,

kyns my dhe dhiberth, heb bos namoy.’