Dhe vester an keur: gans daffar kerdyn. Salm a Davydh.

1Gorthyp dhymm pan alwav, A Dhuw ow ewnder!

Ty a'm gorras yn rydhses pan en vy yn anken.

Bydh grassyes orthiv, ha klew ow fysadow.

2Hwi vebyon den, pygemmys prys y fydh ow golewder treylys dhe dhespit?

Pygemmys prys y kerowgh euveredh, ow hwilas gow? Sela.

3Mes godhvydhewgh an Arloedh dhe apoyntya an den duwek dhodho y honan;

an Arloedh a glew pan alwav warnodho.

4Krenewgh, ha na beghewgh;

kewsewgh yn agas kolonn war agas gweli, ha bedhewgh tawesek. Sela.

5Offrynnewgh sakrifisow ewnder,

ha trestyewgh y'n Arloedh.

6Lies huni a lever, ‘Piw a dhiskwa dader dhyn ni?

Drehav warnan golow dha fas, A Arloedh.’

7Ty re worras lowender y'm kolonn

moy ages y'n termyn may feu aga ys ha'ga gwin ynkressys.

8Yn kres my a wrowedh ha koska;

drefenn ty dha honan, A Arloedh, dhe wul dhymm triga yn sawder.