Dhe vester an keur. Salm a Davydh.

1Gwynnvys neb a wra vri a'n den gwann;

an Arloedh a'n delirv yn dydh anken.

2An Arloedh a'n gwith hag a'n bewha;

gwynnvys vydh ev war an nor.

Ha ny'n delivrydh dhe vodh y eskerens.

3An Arloedh a'n menten war y weli pan yw klav;

yn y gleves ty a yaghha oll y gwannegredhow.41:3 Amendys.

4My a leveris, ‘Bydh grassyes orthiv, A Arloedh;

yaghha ow enev, rag my re beghas er dha bynn.’

5Ow eskerens a lever drog er ow fynn:

‘P'eur ferow ev, ha'y hanow a dhe goll?

6Ha pan dheu ev dhe'm gweles,

ev a lever euveredh;

y golonn a guntell sherewneth dhedhi hi hy honan;

pan a ev yn-mes, ev a'n dyllo a-les.

7Oll an re a'm kas a hwyster war-barth er ow fynn;

i a dewl pystik er ow fynn.

8‘Kleves fell’, yn-medhons, ‘a len orto,

hag ev a'y wrowedh, ny sev arta.’

9Ynwedh ow howeth ker ow honan may trestis vy ynno,

neb a dhybris ow bara, re dhrehevis y wewenn er ow fynn.

10Mes ty, A Arloedh, bydh grassyes orthiv,

ha drehav vy rag mayth attylliv dhedha.

11Gans hemma y hwonn vy, ty vos pes da ahanav,

drefenn na arm ow eskar yn trygh warnav.

12Ha my, ty a'm menten heb namm,

ha'm gorra a-dheragos bynitha.

13Benniges re bo an Arloedh, Duw Ysrael,

bys vykken ha bynnari.

Amen, hag Amen.