Dhe vester an keur. Maskil a vebyon Koragh.

1A Dhuw, ni re glewas gans agan diwskovarn,

agan tasow re venegas dhyn ni,

an gweythres a wrussys yn aga dydhyow i,

y'n termyn koth.

2Gans dha leuv ty a fesyas an kenedhlow,

mes ty a's plansas yn aga le;

ty a dhistruis an poblow,

mes gul dhedha triga yn aga le44:2 mes gul dhedha triga yn aga le: Ebrow ha'ga dannvon..

3Rag ny berghennsons an tir der aga kledha aga honan,

ha nyns o aga bregh aga honan a ros budhogoleth dhedha;

mes dha leuv dhyghow jy ha'th vregh,

ha golow dha fas,

rag ty a's kara.

4Ty yw ow Myghtern, A Dhuw;

gorhemmynn budhogoleth dhe Yakob.

5Dredhos y herdhyn ni agan eskerens dhe'n dor;

dre dha hanow ni a stank an re a sev er agan pynn.

6Rag ny drestyav y'm gwarak,

nyns yw ow kledha a re dhymm an budhogoleth.

7Mes ty a'gan delirv dhiworth agan eskerens,

ha gul bismer dhe'n re a'gan kas.

8Yn Duw re wrussyn ni bostya oll an jydh,

ha ni a wormel dha hanow bys vykken. Sela.

9Byttegyns ty re'gan skonyas, ha'gan shamya,

ha nyns edh jy yn-rag gans agan luyow.

10Ty a wra dhyn mos war-dhelergh dhiworth an eskar,

ha'n re a'gan kas a raven dh'aga honan.

11Ty re'gan ros avel deves dhe vos dybrys,

ha re'gan skattras yn mysk an kenedhlow.

12Ty a werthas dha bobel a dravyth,

ha dhiworth aga fris ny gemmersys prow.

13Ty a wra dhyn bos mewl dh'agan kentrevogyon,

skorn ha ges dhe'n re usi yn agan kyrghynn.

14Ty a'gan gwra ensampel yn mysk an kenedhlow,

ha gul dhe'n poblow shakya an penn orthyn.

15Oll an jydh yma ow disenor a-dheragov,

ha meth ow fas re'm kudhas,

16orth lev an den a skorn ha kabla,

drefenn an eskar ha'n dialor.

17Oll hemma re dheuth warnan,

mes ny'th ankevsyn,

ha ny wrussyn ni falsuri erbynn dha gevambos.

18Ny dreylyas agan kolonn war-dhelergh,

ha ny blegyas agan kammow yn-mes a'th hyns,

19kyn y'gan brewsys yn tyller owrgeun,

ha'gan kudha gans skeus ankow.

20Mar ankevyn ni hanow agan Duw,

hag ystynn agan diwleuv dhe Dhuw estren,

21a ny hwither Duw hemma?

Rag ev a woer kevrinyow an golonn.

22A'th wovis jy yth on ni ledhys oll an jydh,

reknys on ni avel deves dhe'n ladhva.

23Difun, prag y koskydh, A Arloedh?

Sav, na skon ni bynitha.

24Prag y kudhydh jy dha fas,

hag ankevi agan anken ha'gan poenvotter?

25Rag agan enev yw plegys dhe'n doust;

agan torr a len orth an dor.

26Sav, ha gweres dhyn ni;

ha daspren ni a-barth dha dregeredh.