Dhe vester an keur: war Shoshannim. Maskil a vebyon Koragh; kan kerensa.

1Yma awen y'm kolonn ow tyghtya kan fin;

my a gan ow ober gwrys rag an Myghtern;

ow thaves yw pluvenn dhe skriba skentel.

2Tekka osta jy ages mebyon den;

leun a ras yw dha dhiwweus,

rakhenna Duw re'th vennigas bynitha.

3Kolm dha gledha war dha vordhos, ty vreselyas,

gans dha splannder ha'th veuredh.

4Hag y'th veuredh marghok yn sewena

drefenn gwirder ha klorder hag ewnder;

ha'th leuv dhyghow a dhysk dhis taklow euthyk.

5Lymm yw dha sethow yn kolonn eskerens an myghtern;

poblow a goedh yn-dannos.

6Dha se, A Arloedh, a dhur bys vykken ha bynnari.

Gwelenn dha vyghterneth yw gwelenn a ewnder.

7Ty a garas ewnder ha kasa sherewneth.

Rakhenna Duw, dha Dhuw jy, re'th untyas

gans oyl lowender a-ugh dha gowetha.

8Yma sawer myrr, aloes ha kassia war dha wiskow oll.

Yn-mes a balasys a dhans-olifans, telynnow a'th lowenha.

9Yma myrghes myghternedh yn mysk dha wragedh bryntin;

orth dha leuv dhyghow y sev an vyghternes gwiskys yn owr a Ofir.

10Klew, A vyrgh, ha gwel, ha pleg dha skovarn;

hag ankov dha bobel ha chi dha das,

11ha'n Myghtern a vydh hwansek dhe'th tekter;

rag ev yw dha ARLOEDH, ytho gwra y wordhya.

12Myrgh Tyr a vydh a-ragos gans ro,

ha'n dus rych yn mysk an bobel a bys dha favour.

13Myrgh an Myghtern yw leun a splannder a-berth y'n palys;

hy gwisk yw oberys gans owr.

14Hi a vydh dres dhe'n myghtern yn dillas brosys;

an maghtethyon hy howethesow neb a's hol a's hembronk dhis.

15Gans heudhder ha lowender i a vydh hembrenkys;

yth ons i yn palys an Myghtern.

16Dha vebyon a vydh yn le dha dasow;

ty a's gwra pennternedh war oll an nor.

17My a wra dhe govadh dha hanow durya a unn henedh dhe'n nessa;

rakhenna poblow a'th wormel bys vykken ha bynnari.