Kan. Salm a vebyon Koragh.

1Meur yw an Arloedh, ha gwiw dhe vos gormelys yn feur

yn sita agan Duw, yn y venydh sans.

2Teg hy ughelder, lowender oll an nor,

yw menydh Sion, yn pella rannow an kledh,

sita an myghtern meur.

3Aswonnys yw Duw yn hy lysyow

avel dinas krev.

4Rag otta, an vyghternedh a omguntellas,

i a dremenas war-barth.

5I a welas, ytho marth a's teva;

dyegrys ens i, hag i a fyskas dhe-ves.

6Skruth a's dalghennas ena,

ha payn, avel benyn yn lavur.

7Gans gwyns an howldrevel

ty a vrew gorholyon Tarshish.

8Dell glewsyn ni, yn kettella y hwelsyn ni

yn sita Arloedh an luyow,

yn sita agan Duw;

Duw a wra hy fastya bynitha. Sela.

9Ni re brederis a'th tregeredh, A Dhuw,

yn kres dha dempel.

10Kepar dell yw dha hanow, A Dhuw,

yndella yw dha wormola, bys yn pennow an nor;

dha leuv dhyghow yw leun a ewnder.

11Lowenhes menydh Sion, bedhes myrghes Yuda heudhik

drefenn dha vreusow jy.

12Kerdhewgh a-dro dhe Sion, kewgh a-dro dhedhi,

niverewgh hy thouryow.

13Merkyewgh yn ta hy fosow, prederewgh a'y balesyow,

ma'n deriffowgh dhe'n henedh a dheu.

14Rag an Duw ma yw agan Duw ni bys vykken ha bynnari.

Ev a'gan hembronk bynitha.