Dhe vester an keur. Salm a vebyon Koragh.

1Klewewgh hemma, oll an poblow;

rewgh skovarn, oll an re usi trigys y'n norvys.

2Tus isel hag ughel,

an den rych ha'n den boghosek war-barth.

3Ow ganow a gews a furneth;

ha prederow ow holonn a re dhis konvedhes.

4My a bleg ow skovarn dhe barabolenn;

my a styr ow lavar tewl war an sowtri.

5Prag y porthav own yn drog dhydhyow,

pan omsett kammweyth ow eskerens a-dro dhymm?

6I a drest yn aga fythow

hag a vost yn braster aga rychys.

7Mes devri ny yll nagonan anedha prena y vroder,

na ri daspren dhe Dhuw ragdho.

8Re gostek via daspren y enev,

ha ny allses pe henna bynitha,

9rag may fewa bynitha

ha ma na wella an pytt.

10Rag ev a wel tus skiansek dhe verwel,

ha'n den anfur ha'n talsogh keffrys a dhe goll,

ha gasa aga fythow dhe dus erell.

11Aga bedh yw aga chi bynitha,

ha'ga annedhow a unn henedh dhe'n nessa;

i a elow aga thiryow herwydh aga henwyn aga honan.

12Mes ny bes den yn enor;

haval yw dhe'n bestes a verow.

13Hemm yw fordh an re dalsogh;

ha plegadow dh'aga henedh yw aga lavarow. Sela.

14Avel deves ymons i gorrys yn ifarn;

ankow a's bugel,

ha'n re ewnhynsek a wra maystri warnedha y'n myttin.

i a dhiyskynn dison dhe'n bedh.

Aga furv a beder y ifarn;

pell dhiworth aga chiow ughel.

15Mes Duw a dhaspren ow enev dhiworth dalghenn ifarn,

rag ev a'm degemmer. Sela.

16Na borth own pan vo gour gwrys rych,

pan vo splannder y ji moghhes.

17Rag ny gemmer ganso travyth pan varwo;

ny dhiyskynn y splannder war y lergh.

18Rag ev a vennik y enev hag ev yn few,

ha tus a'th wormel pan sewenydh.

19Ev a dhe henedh y dasow,

ny welons golow bynitha.

20Mes den yn y vueredh ny gonvedh;

haval yw dhe'n bestes a verow.