Dhe vester an keur: gans pibow. Salm a Davydh.

1Ro skovarn dhe'm geryow, A Arloedh;

gwra vri a'm hanasa.

2Goslow orth lev ow kri,

ow Myghtern, ha'm Duw,

rag dhiso jy y pysav.

3A Arloedh, y'n myttin ty a glew ow lev;

y'n myttin my a orden ow fysadow orthis, ha goelyas.

4Rag nyns osta Duw a gemmerro plesour yn sherewneth;

ny yll drog triga genes jy.

5Ny sev an re woethus y'th wolok;

ty a gas an dhrogoberoryon oll.

6Ty a dhistru an re a wowlever;

an Arloedh a gas an gour goesek ha fals.

7Mes my a dheu y'th chi

dre dha dregeredh meur;

my a ombleg troha'th tempel sans

yn own ahanas.

8Hembronk vy, A Arloedh, y'th ewnder

drefenn ow eskerens;

gwra dha fordh kompes a-dheragov.

Fyn aga

9Rag nyns eus lelder yn aga ganow;

aga holonn yw leun a spit.

Aga lonk yw logel igor,

i a fekyl gans aga thaves.

10Gwra dhedha perthi kessydhyans aga fegh, A Dhuw;

koedhens i der aga husulyow aga honan;

towl i dhe-ves herwydh aga lies treuspass;

rag i re sevis er dha bynn.

11Mes lowenhes seul a hwila skovva ynnos,

kanens i rag joy bynitha,

rag ty dh'aga gwitha,

ha bedhes heudhik ynnos an re a gar dha hanow.

12Rag ty, A Arloedh, a vennik an den gwiryon;

ty a'n kudh gans favour kepar ha gans skoes.