Dhe vester an keur. Maskil a Davydh, pan dheuth Doeg an Edomyas ha leverel dhe Sowl, ‘Re dheuth Davydh dhe ji Ahimelek.’

1Prag y fostydh yn drogober, ty vreselyas?

Tregeredh Duw a dhur oll an jydh.

2Dha daves a breder terroes,

yth yw avel altenn lymm,

ow kul falsuri.

3Ty a gar drog moy ages da,

ha gowleverel moy ages kewsel gwiryonedh. Sela.

4Ty a gar oll geryow fell,

ty fals taves.

5Duw ynwedh a'th tistru bynitha;

ev a'th kemmer dhe-ves, ha'th tenna yn-mes a'th tylda,

ha kemmeres dha wreydhenn mes a dir an re vew. Sela.

6An re wiryon a wel, ha perthi own,

ha hwerthin orto:

7‘Ottomma an gour

na wrug Duw y skovva,

mes ev a drestyas yn y rychys meur,

ha hwilas skovva yn y sherewneth.’

8Mes my yw avel olewbrenn glas yn chi Duw.

My a drest yn tregeredh Duw

bys vykken ha bynnari.

9My a'th wormel bynitha, rag ty dhe wul hemma,

ha fydhya a wrav y'th hanow, rag da yw,

a-wel dhe'th syns.