Dhe vester an keur. Gans daffar kerdyn. Maskil a Davydh.

1Ro skovarn, A Dhuw, dhe'm pysadow,

ha na omgudh rag ow govynnadow.

2Goslow orthiv, ha gorthyp dhymm.

Grevys ov55:2 Grevys ov Amendys, ow siwya an Septuagint. y'm krodhvol, ha gul kynvann

3drefenn lev an eskar,

drefenn gwask an tebelwas;

rag i a dhre trobel warnav,

hag yn sorr i a'm kas.

4Ow holonn yw paynys yn feur a-bervedh ynnov,

hag euth ankow re goedhas warnav.

5Own ha skruth re dheuth warnav,

ha kren re'm kudhas.

6Ha my a leveris, ‘A pe genev eskelli avel kolomm

ena y hwrussen vy nija dhe-ves ha powes;

7otta, my a wandersa a-bell,

ha triga y'n difeyth. Sela.

8My a fisa toeth men dhe skovva

rag an korwyns ha'n annawel.’

9Distru, A Arloedh, ha fols aga thavosow;

rag my re welas garowder ha strif y'n sita.

10Dydh ha nos ymons i ow mos a-dro dhedhi war hy fosow;

yma dregynn ha meschyv a-bervedh ynni.

11Yma terroes a-bervedh ynni;

ny dhiberth arwask na falsuri

dhiworth hy stretys.

12Rag ny veu eskar neb a'm skornyas;

mara pe, my a'n porthsa;

ha nyns o an den a'm kasas neb a'm despityas;

mara pe, my a omgudhsa ragdho;

13mes ty, den avelov vy,

ow heskoweth, ha'm kothman.

14Ni a geskewsi yn hweg an eyl gans y gila,

ha ni ow kerdhes yn chi Duw gans an routh.

15Des ankow warnedha,

ha diyskynnens yn few dhe ifarn;

rag yma sherewneth yn aga annedhow, hag yn aga mysk.

16Mes my a elow war Dhuw,

ha'n Arloedh a'm selow.

17Y'n gorthugher hag y'n myttin, ha dhe hanter-dydh

my a grodhvol ha kyni,

hag ev a glew ow lev.

18Ev a dhelivras ow enev yn kres

dhiworth an gas o er ow fynn,

rag yth esa lies huni a strivyas genev.

19Duw a glewvydh hag a worthyp dhedha,

ev neb re reynyas war y dron bythkweth. Sela.

Rag nyns eus treylvaow dhedha,

ha ny berthons own a Dhuw.

20Ev re worras y leuv erbynn an re usi yn kres ganso;

ev re dorras y gevambos.

21Aga ganow o levenna es amanynn,

mes yth esa bresel yn aga holonn;

aga lavarow o medhella ages olew,

mes yth ens i kledhedhyow noeth.

22Towl dha vegh war an Arloedh,

hag ev a'th sosten;

ny as ev nevra an re wiryon dhe drebuchya.

23Mes ty, A Arloedh, a's gorr yn-nans

dhe doll an pytt;

ny vew tus woesek ha fals

moy ages hanter aga dydhyow;

byttegyns my a drest ynnos jy.