Dhe vester an keur: war Yonath Elem Rehokim56:0 Yonath Elem Rehokim: Hemm yw dhe styrya Golomm an Derow Pell.. Miktam a Davydh, pan y'n dalghennas an Filistysi yn Gath.

1Bydh grassyes orthiv, A Dhuw, rag den a vynn ow helghya;

oll an jydh ev a omladh, orth ow gwaska.

2Ow eskerens re'm plagyas oll an jydh,

rag lies a omladh er ow fynn, A Dhuw Ughella.56:2 A Dhuw Ughella: Amendys

3Y'n jydh may porthav own

my a drest ynnos jy.

4Yn Duw may hwormolav y er,

yn Duw my a drest, ny borthav own;

pandr'a yll kig dhe wul er ow fynn?

5Oll an jydh i a gammgemmer ow geryow;

yma oll aga frederow er ow fynn rag drog.

6I a omguntell, i a omgel,

i a verk ow hammow,

pan gontrewaytyons ow enev.

7Gwra aga rewardya herwydh aga sherewneth;

yn sorr, towl an poblow dhe'n dor, A Dhuw.

8Ty re verkyas ow gwandrans;

gorr ow dagrow y'th votell.

A nyns yns i skrifys y'th lyver?

9Ena y treyl ow eskerens war-dhelergh

y'n jydh may halwav.

Hemma a wonn; rag yma Duw genev.

10Yn Duw may hwormolav y er,

y'n Arloedh may hwormolav y er,

11yn Duw y trestyav, ny borthav own;

pandr'a yll den dhe wul er ow fynn?

12Yma dha ambosow warnav, A Dhuw;

my a's tal dhis gans offrynnow grasyans.

13Rag ty re dhelivras ow enev dhiworth ankow,

ha'm treys dhiworth trebuchya,

rag may kerthiv a-rag Duw

yn golow an re vew.