Dhe vester an keur: Al Tashheth. Miktam a Davydh, pan fias dhiworth Sowl, y'n mogow.

1Bydh grassyes orthiv, A Dhuw, bydh grassyes orthiv,

rag ow enev a hwila skovva ynnos;

hag yn-dann skeus dha eskelli y fydh ow skovva,

erna vo an droglammow ma tremenys.

2My a elow war Dhuw Ughella,

war Dhuw a gowlwra pup-tra ragov.

3Ev a dhyllo dhiworth nev,

ha'm sawya a dhespit an den a'm stank. Sela.

Duw a dhannvon y dregeredh ha'y wirder.

4Yma ow enev yn mysk lewyon;

ha my a wrowedh yn mysk tus ow flammya gans sorr;

aga dyns yw guwow ha sethow,

ha'ga thaves yw kledha lymm.

5Bydh ughelhes, A Dhuw, a-ugh an nevow;

bedhes dha wolewder dres oll an nor.

6I re bareusis roes rag ow hammow,

ow enev yw plegys dhe'n dor.

I re gleudhyas pytt a-dheragov,

hag i aga honan re goedhas a-bervedh ynno. Sela.

7Fast yw ow holonn, A Dhuw,

fast yw ow holonn;

kana a wrav vy, ha gormel.

8Difun, ow gordhyans;

difunewgh, telynn ha sowtri;

my a dhifun orth dydh-tardh.

9My a'th wormel, A Arloedh, yn mysk an poblow,

ha kana gormola dhis yn mysk an kenedhlow.

10Rag dha dregeredh yw meur bys y'n nevow,

ha'th wirder bys y'n kommol.

11Bydh ughelhes, A Dhuw, a-ugh an nevow;

bedhes dha wolewder dres oll an nor.