Dhe vester an keur: Al Tashheth. Miktam a Davydh, pan dhannvonas Sowl tus dhe aspia orth y ji, rag y ladha.

1Gwra ow delivra dhiworth ow eskerens, A Dhuw;

gwith vy rag an re a sev er ow fynn.

2Gwra ow delivra dhiworth an dhrogoberoryon;

ha gwra ow sawya a'n dus woesek.

3Rag otta, i a gontrewayt ow enev;

an re alloesek a omguntell er ow fynn.

Heb kammweyth na pegh genev, A Arloedh,

4poenya a wrons i hag ombareusi heb kammweyth genev;

difun dhe'm gweres, ha mir.

5Ha ty, A Arloedh, Duw an luyow, Duw Ysrael,

difun dhe wul vri a'n kenedhlow oll;

na vydh grassyes orth an fals dhrogoberoryon. Sela.

6I a dhehwel y'n gorthugher,

i a dheskern avel ki

ha poenya a-dro y'n sita.

7Otta, usa a wrons gans aga ganow,

hag yma kledhedhyow yn aga gweusyow,

ow leverel, ‘Piw a glew?’

8Mes ty, A Dhuw, a wra ges anedha;

ty a hwerth orth oll an kenedhlow.

9Ow nerth vy, my a'th worta;

rag Duw yw ow dinas.

10Duw ow thregeredh a a-dheragov;

Duw a wra dhymm gweles ow mynnas war ow eskerens.

11Na's ladh, ma na ankoffo ow fobel;

gwra i dhe wandra gans dha nerth,

ha'ga dri dhe'n dor, A Arloedh agan skoes.

12Rag pegh aga ganow, ha geryow aga gweusyow,

bedhens i kemmerys yn aga goeth.

Ha rag an mollethi ha'n gowleverel a leverons,

13gwra aga distrui y'th sorr,

distru, rag na vons namoy.

Godhvydhens i Duw dhe rewlya yn Yakob,

ha bys yn pennow an nor. Sela.

14Hag y'n gorthugher i a dhehwel;

i a dheskern avel ki

ha poenya a-dro y'n sita.

15I a wander a-derdro rag boes,

ha krodhvolas mar ny gevons lowr.

16Mes my a gan a'th nerth,

ha my a gan yn ughel a'th tregeredh y'n myttin.

Rag ty re beu ow dinas,

ha skovva yn dydh ow anken.

17Dhiso jy, ow nerth, y kanav gormola;

rag Duw yw ow dinas, an Duw a'm tregeredh.