Dhe vester an keur: war Shushan Eduth. Miktam a Davydh; dhe dhyski; pan strivyas gans Aram Naharaym ha gans Aram Soba, ha pan ladhas Yoab dewdhek mil a dus Edom yn nans an Hoelan, hag ev ow tehweles.

1A Dhuw, ty re'gan skonyas, ha'gan terri;

ty re sorras; treyl arta dhyn ni.

2Ty re gryghyllis an nor, ha'y folsa;

yaghha y dorrvaow, rag ev a gren.

3Ty re dhiskwedhas dhe'th pobel taklow kales;

ty re wrug dhyn ni eva gwin a benn-dro.

4Ty re ros baner dhe'n re a berth own ahanas,

rag may fions dhiworth an warak. Sela.

5Rag may fo dha garadowyon delivrys,

salw dre dha leuv dhyghow, ha klew vy.

6Duw re gewsis yn y sansoleth:

‘My a lowenha, ha ranna Shekem,

ha musura nans Sukkoth.

7Gilead yw dhymm, ha Manasse yw dhymm;

Efraym ynwedh yw nerth ow fenn;

Yuda yw ow gwelenn.

8Moab yw ow seth-golghi;

dres Edom y teghesav ow eskis;

war Filistia my a arm yn trygh.’

9Piw a'm dre a-berth y'n dinas krev?

Piw a'm hembronk bys yn Edom?

10A ny'gan forsaksys, A Dhuw?

Nyns edh yn-mes gans agan luyow.

11Ro dhymm gweres erbynn an eskar,

rag euver yw gweres den.

12Dre Dhuw y hwren ni obereth meur;

ev yw neb a drett agan eskerens dhe'n dor.