Dhe vester an keur: war Yeduthun. Salm a Davydh.

1Ow enev yn tevri a worta an Arloedh;

dhiworto y teu ow selwyans.

2Ev y honan yw ow harrek ha'm selwyans,

ow dinas ma na vydhav disevys nevra.

3Pygemmys prys y settyewgh war dhen,

orth y voldra, hwi oll,

avel fos kromm, po avel ke herdhys yn-nans?

4I a omgusul unnweyth fatell yllons y dewlel dhe'n dor

dhiworth y ughelder;

i a gemmer plesour yn gowyow;

i a vennik gans aga ganow,

mes i a volleth yn aga holonn. Sela.

5Ow enev, gorta Duw y honan,

rag ynno ev yma ow govenek.

6Ev y honan yw ow harrek ha'm selwyans;

ow dinas, ma na goetthiv.

7Yn Duw yma ow selwyans ha'm gordhyans;

ev yw karrek ow nerth, hag yn Duw yma ow skovva.

8Trestyewgh ynno ev pup-prys, A bobel;

dinewewgh agas kolonn a-dheragdho,

rag Duw yw agan skovva. Sela.

9Yn tevri, euveredh yw tus isel,

ha tus ughel yw gow;

y'n vantol yth ons i war-vann,

skaffa yns i es euveredh.

10Na drestyewgh yn garowder,

ha na fydhyewgh yn euver yn ladrans;

mar moghha rychys, na worrewgh agas kolonn warnodho.

11Unnweyth re gewsis Duw,

my re glewas hemma diwweyth:

bos galloes dhe Dhuw.

12Ha dhiso jy, A Arloedh, yma tregeredh;

rag ty a attal dhe bub huni

herwydh y oberow.