Salm a Davydh, pan esa yn difeyth Yuda.

1A Dhuw, ty yw ow Duw, my a'th hwither dihwans.

Yma syghes dhe'm enev war dha lergh,

ow hig a'n jeves hireth ragos,

yn tir kras ha sygh ma nag eus dowr.

2Yn kettella re viris vy orthis y'n sentri,

dhe weles dha nerth ha'th wolewder.

3Rag gwell yw dha dregeredh ages bewnans;

ow diwweus a'th wormel.

4Ytho my a'th vennik hedre vewiv;

my a dhrehav ow diwleuv dhe'th hanow.

5Ow enev a vydh kontentys kepar dell ve gans mer ha blonek,

ha'm ganow a'th wormel gans diwweus heudhik,

6pan borthav kov ahanas war ow gweli,

ha prederi ahanas yn goelyow an nos.

7Rag ty re beu ow gweres,

hag yn skeus dha eskelli y kanav gormola.

8Ow enev a len orthis;

dha leuv dhyghow a'm menten.

9Mes an re a hwila ow enev rag y dhistrui

yth ons yn rannow isella an nor.

10I a vydh delivrys dhe nerth an kledha;

i a vydh rann dhe'n owrgeun.

11Mes an myghtern a lowenha yn Duw;

oll an re a de yn y hanow ev a vost,

rag ganow an re a wowlever a vydh deges.