Dhe vester an keur. Salm a Davydh. Kan.

1Y tegoedh dha wormel,65:1 Y tegoedh dha wormel: Ow siwya an Septuagint ha'n Syriek. Ebrow Taw dhis yw gormel.

A Dhuw, yn Sion,

ha dhiso jy y fydh an ambos kollenwys.

2Ty neb a woslow orth pysadow,

dhiso jy y teu pub kig.

3Kammweythresow yw re grev ragov;

agan kammwriansow ni, ty a's glanha.

4Gwynnvys an den a dhewisydh

hag a dhredh nes dhis, may trykko y'th klosyow;

ni a vydh lenwys a dhader dha ji,

ha'th tempel sans.

5Ty a worthyp dhyn gans taklow euthyk yn ewnder,

A Dhuw agan selwyans;

ty, neb yw fydhyans oll pennow an nor,

ha'n re usi pell war an mor.

6Der y nerth y hwra ev fastya an menydhyow;

yma grogys a alloes a-dro dhodho.

7Ev a spavennha tros an mor,

tros an mordonnow

ha freudh an poblow.

8Ynwedh an re a drig yn pella sornow an nor a berth own a'th toknys;

ty a wra dhe borthow an bora ha'n gorthugher kana gormola.

9Ty a vir orth an nor ha'y dhowra,

ty a wra dh'y feythter ynkressya;

avon Duw yw leun a dhowr;

ty a brovi ys ragdha,

rag yndella ty re'n darbaris.

10Ty a dhowrha y fynnglow,

ha levenhe y ryllow,

ty a'n medhelha gans kowasow,

ha benniga y eginyow.

11Ty a gurun an vlydhen gans dha dhader,

ha'th fordhow a dhever gans feythter.

12Peurvaow an difeyth a dhever,

ha'n bronnow yw grogysys gans lowender.

13An peurvaow re omwiskas gans flokkys,

an nansow re omgwethas gans ys,

i a arm gans lowender, ha kana.