Dhe vester an keur. Kan. Salm.

1Gwrewgh tros heudhik dhe Dhuw, oll an nor;

2kenewgh gordhyans y hanow,

gwrewgh dh'y wormola bos gloryus.

3Leverewgh dhe Dhuw, ‘Ass osta euthyk y'th wriansow!

Dre vraster dha nerth yth ombleg dha eskerens dhiso jy.

4Oll an nor a'th wordh;

ha kana dhis,

ha gormel dha hanow.’ Sela.

5Dewgh, ha gwelewgh gwriansow Duw;

euthyk yw ev yn y weythres orth mebyon den.

6Ev a dreylyas an mor dhe dir sygh;

mayth ethons der an avon war dreys;

ena ni a lowenhas ynno.

7Ev a rewl der y nerth bynitha;

y dhewlagas a aspi an kenedhlow;

na vedhes an re worth ughelhes.

8Bennigewgh agan Duw, hwi boblow,

ha gwrewgh dhe lev y wormola bos klewys,

9neb a with agan enev yn bewnans,

ha ny as agan treys dhe drebuchya.

10Rag ty, A Dhuw, re'gan provas;

ty re'gan assayas, dell yw arghans assayys.

11Ty a asas dhyn koedha y'n roes;

ty a worras ahwer war agan diwglun.

12Ty re wrug dhe dus marghogeth dres agan pennow;

ni a dremenas dre dan ha dre dhowr,

mes ty a'gan dros yn tyller ledan.

13My a dheu y'th chi gans offrynnow leskys;

ha my a dal dhis ow ambosow,

14a leveris ow diwweus

hag a gewsis ow ganow pan esen yn poenvos.

15My a brof dhis offrynnow leskys a enyvales peskys,

gans ynkys hordhes;

my a offrynn lodhnow gans gever. Sela.

16Dewgh ha klewewgh, oll hwi a berth own a Dhuw,

ha my a dheriv an pyth a wrug ev rag ow enev.

17My a elwis warnodho gans ow ganow,

hag yth esa gormola war ow thaves.

18Mar kwellen vy sherewneth y'm kolonn,

ny'm klewsa an Arloedh.

19Mes Duw yn hwir re glewas;

ev re woslowas orth lev ow fysadow.

20Benniges re bo Duw,

na dreylyas ow fysadow dhe-ves,

na skonya ri dhymm y dregeredh.