Dhe vester an keur: war Shoshannim. Salm a Davydh.

1Salw vy, A Dhuw,

rag an dowrow re dheuth bys y'm enev.

2My a sedh yn leysek dhown,

ma nag eus tyller may seffiv;

my re dheuth yn dowrow down,

may hwra an livow resek warnav.

3Skwith ov vy ow karma;

ronk yw ow bryansenn.

Ow dewlagas a fyll,

ha my ow kortos ow Duw.

4Moy es blewennow ow fenn

yw an re a'm kas heb ken;

lies yw an re a vynn ow distrui,

ow fals eskerens.

An pyth na wrug vy y ladra,

a wrav vy y daskorr?

5A Dhuw, ty a aswonn ow follneth,

ha nyns yw ow hammwriansow kudhys ragos.

6Na berthes meth a'm govis vy an re a'th worta,

A Arloedh, Duw an luyow;

na vedhes konfondys a'm govis vy an re a'th hwila,

A Dhuw Ysrael.

7Rag a-barth dhiso jy y perthis vy bismer,

despit re gudhas ow fas.

8My re dheuth ha bos estren dhe'm breder,

hag alyon dhe fleghes ow mamm.

9Rag tan ow holonn a-barth dha ji re'm kollonkas,

ha despit an re a'th skorn jy re goedhas warnav vy.

10Pan wrugavy dhe'm enev kyni gans penys,

treylys o henna yn mewl dhymm.

11Ha my a omwiskas yn yskar,

my eth ha bos ensampel dhedha.

12An re a esedh y'n porth a gews er ow fynn,

ha'n bennow-medhow a gan ahanav yn ges.

13Mes ow fysadow yw dhiso jy, A Arloedh;

yn prys plegadow, A Dhuw,

gorthyp dhymm y'th tregeredh veur, yn gwirder dha selwyans.

14Gwra ow delivra dhiworth an leysek,

rag na setthiv;

gas vy dhe vos delivrys dhiworth an re a'm kas,

hag yn-mes a dhowrow down.

15Na as an liv dhe frosa dresov,

ha na as an downder dhe'm kollenki,

ha na as an pytt dhe dhegea y anow warnav.

16Gorthyp dhymm, A Arloedh, rag da yw dha dregeredh;

treyl dhymmo vy, herwydh dha druedh meur.

17Ha na gudh dha fas rag dha was,

drefenn ow bos yn anken, gorthyp dhymm yn skon.

18Deus nes dhe'm enev, ha'y brena;

gwra ow delivra dhiworth ow eskerens.

19Ty a aswonn ow mewl,

ha'm meth, ha'm despit;

yma oll ow eskerens a-dheragos.

20Mewl re dorras ow holonn,

ha paynys bras a'm beus.

My a hwilas neb a gemmerra truedh ahanav, mes nyns esa;

ha konforters, mes ny's kevis.

21I a ros dhymm ynwedh bystel rag ow boes,

hag y'm syghes i a ros dhymm aysel.

22Bedhes aga moes antell a-dheragdha,

ha'ga offrynnow kres, bedhens maglenn.

23Bedhes aga dewlagas tewl rag na wellons,

ha gwra dh'aga diwglun prest krena.

24Dyllo warnedha dha goler,

ha re wrello dha sorr fers aga sesya.

25Bedhes aga annedh ynyal;

na vedhes triger yn aga thyldow.

26Rag i a helgh an den a wrussys y weskel,

hag ynkressya galar an re a vrewsys.

27Keworr kammweyth dh'aga hammweyth i,

ha na dhens i y'th ewnder.

28Bedhens i defendys dhe-ves a lyver an re vew,

ha na vedhens i skrifys yn mysk an re wiryon.

29Ha my, truan ov vy ha poenvosek;

re'm drehaffo dha selwyans, A Dhuw.

30My a wormel hanow Duw gans kan,

ha my a'n meurha gans grasyans.

31Ha hemma a vydh gwell gans an Arloedh ages ojyon,

po ages lodhen ha dhodho kern ha karnow.

32An re hwar a'n gwelas, ha lowen yns i;

hwilewgh Duw, ha'gas kolonn a vew.

33Rag an Arloedh a glew an re edhommek,

ha ny dhispres ev an brisnoryon.

34Gormeles ev nev ha nor,

an moryow ha pup-tra eus ow slynkya ynna.

35Rag Duw a selow Sion,

ha drehevel sitys Yuda;

hag i a drig ena ha'y ferghenna.

36Has y wesyon ynwedh a's erit,

ha'n re a gar y hanow a drig ynni.