1Ynnos jy, A Arloedh, y hwilav skovva;

na as vy dhe berthi meth bynitha.

2Gwra ow delivra y'th ewnder ha'm difres;

pleg dha skovarn dhymm ha'm sawya.

3Bydh dhymm karrek grev may tyffiv dhedhi pup-prys;

ty re worhemmynnis ow selwel,

rag ty yw ow harrek ha'm kastell.

4Gwra ow delivra, A Dhuw, dhiworth leuv an tebelwas,

dhiworth dorn an den kammhynsek ha didruedh.

5Rag ty yw ow govenek, A Arloedh Duw,

ow fydhyans dhiworth ow yowynkneth.

6Genes jy re beuv mentenys dhiworth an brys,

ty yw neb a'm kemmeras dhiworth torr ow mamm;

ow gormola a vydh prest ahanas.

7My re dheuth ha bos marthus dhe lies huni,

mes ty yw ow skovva grev.

8Bedhes ow ganow lenwys a'th wormola,

ha'th glori oll an jydh.

9Na'm towl vy dhe-ves yn termyn henys;

na'm forsak vy pan fyll ow nerth.

10Rag ow eskerens a gews er ow fynn,

ha'n re a gontrewayt ow enev a omgusul war-barth;

11Hag yn-medhons i, ‘Duw re'n forsakyas;

helghyewgh ev, ha'y gemmeres;

rag nyns eus den a'n deliffro.’

12A Dhuw, na vydh pell dhiworthiv;

ow Duw, deus uskis dhe'm gweres.

13Perthens i meth ha mos dhe goll, neb yw eskerens ow enev;

bedhens i kudhys gans mewl ha disenor,

neb a hwila ow fystik.

14Mes my a wayt heb hedhi,

ha my a'th wormel moy ha moy.

15Ow ganow a dheriv dha ewnder

ha'th selwyans oll an jydh,

rag ny wonn aga niver.

16My a dheu yn nerth an Arloedh DUW;

my a dhre dhe gov dha ewnder jy dha honan.

17A Dhuw, ty re dhyskas dhymm dhiworth ow yowynkneth,

ha prest re venegis vy dha varthusyon.

18Ha lemmyn y'm henys, ha loes ow blew,

A Dhuw, na wra ow forsakya,

erna dheriffiv dha alloes dhe'n kenedhel ma,

dha nerth dhe bub henedh a dheu.

19Ha'th ewnder, A Dhuw, a dhrehedh dhe'n ughelder,

ty neb re wrug gwriansow meur; A Dhuw, piw yw avelos jy?

20Ty, neb re dhiskwedhas dhymm lies anken bras ha drog,

a'm bewha arta;

ha ty a'm dre yn-bann

dhiworth downderyow an nor.

21Ty a voghha ow enor,

ha'm hebaskhe arta.

22My a'th wormel ynwedh gans an telynn

drefenn dha wiryonedh, ow Duw;

my a gan dhiso jy gans an sowtri,

ty Sans Ysrael.

23Ow diwweus a arm yn lowen

pan ganav gormola dhiso jy;

ha'm enev ynwedh hag a brensys.

24Ha'm taves a gews a'th ewnder oll an jydh,

rag i a berth meth, yth yns i shyndys,

neb a hwila ow fystik.