LYVER III

Salm a Asaf.

1Da yn hwir yw Duw orth Ysrael,

orth an re yw glan aga holonn.

2Byttegyns nammna drebuchyas ow threys;

ogas disevys o ow hammow.

3Rag my a borthas envi orth an re woethus

pan welis vy sewenyans an debeles.

4Rag nyns eus dhedha gloesow;73:4 gloesow: Amendys.

yagh ha krev yw aga horfow.

5Nyns yns i yn poenvotter dell yw tus erell,

ha nyns yns i pystigys dell yw tus erell.

6Rakhenna yma goeth a-dro dh'aga honna avel torgh;

garowder a's kudh avel kweth.

7Aga dewlagas a hwedh gans tewder;

i a's teves moy ages konsayts aga holonn.

8I a wra ges, ha kewsel yn spitus;

i a wodros arwask, ughel aga fenn.

9I re settyas aga ganow erbynn an nevow,

ha'ga thaves a gerdh der an nor.

10Rakhenna ow fobel a dreyl dhedha,

ha lapya oll aga lavarow avel dowr.73:10 Amendys. Styr an Ebrow yw ankler.

11Hag i a lever, ‘Fatell woer Duw?

Eus godhvos gans an Ughella?’

12Otta, yndella yw an debeles;

attes yns i pup-prys, ha'ga rychys a voghha.

13Sur, my re lanhas ow holonn yn euver

ha golghi ow diwleuv yn gwiryonsys.

14Rag oll an jydh yth en vy gweskys,

ha pystigys pub myttin.

15Mar lavarren, ‘Yn kettella y kowsav vy’,

my a draytas henedh dha fleghes.

16Pan ombrederis fatell gonvedhyn vy hemma,

poenvotter o ev y'm golok vy,

17ernag yth vy yn sentri Duw;

ena y konvedhis vy aga diwedh i.

18Sur, ty a's gorras yn tylleryow slynk;

ty a wrug dhedha koedha yn terroes.

19Fatell ons i distruys yn unn lamm,

skubys glan dhe-ves gans browaghow!

20Avel hunros pan dhifun den;

A Arloedh, pan dhifunydh jy, ty a dhispres aga imajys tremenadow.

21Rag moredhek o ow holonn,

ha gloesow a envi eth der ow diwloneth.

22Mar dalsogh en vy, ha diskians;

kepar ha lodhen en vy a-dheragos.

23Byttegyns yth esov vy prest genes;

ty re'm synsis er ow leuv dhyghow.

24Gans dha gusul ty a'm lew,

ha wosa henna ow hemmeres yn golewder.

25Piw a'm beus y'n nevow marnas ty?

Ha nyns eus travyth war an nor a yeunniv marnas ty.

26Ow hig ha'm kolonn a fyll,

mes Duw yw nerth ow holonn ha'm rann bys vykken.

27Rag otta, an re usi pell dhiworthis a dhe goll;

ty re dhistruis oll an re a wra horyans er dha bynn.

28Mes da yw ragov dos ogas dhe Dhuw;

my re wrug an Arloedh Duw ow skovva,

rag may teriffiv dha wriansow oll.