Maskil a Asaf.

1Prag, A Dhuw, re'gan skonsys bynitha?

Prag y feg dha sorr orth deves dha beurva?

2Porth kov a'th kuntelles a brensys seuladhydh,

loeth dha ertach a dhasprensys,

ha menydh Sion may trigsys ynno.

3Treyl dha gammow troha'n magoryow nevra a bes;

an sherewneth oll re wrug an eskar y'n sentri.

4Usa re wrug dha eskerens yn mysk dha guntellva;

i a dhrehav aga baneryow avel toknys.

5Haval ens i dhe dus eus ow hakkya

gans boelyow war goeswik dew.

6Ha lemmyn i a dhral oll an prennweyth gravys

gans boelyow ha mortholow.

7I re worras tan y'th sentri;

bys y'n dor i re dhefolas trigva dha hanow.

8I a leveris yn aga holonn, ‘Gwren ni aga diswul yn tien’;

i re loskas oll kuntellvaow Duw y'n pow.

9Ny welyn agan toknys,

nyns eus profoes byth moy,

ha nyns eus yn agan mysk neb a wodhvo pygemmys prys.

10Pygemmys prys, A Dhuw, y hwra an eskar ges?

A dhispres an eskar dha hanow bys vykken?

11Prag y tennydh dha leuv, dha leuv dhyghow, war-dhelergh?

Kemmer hi dhiworth dha askra ha'ga hisya.

12Rag Duw re beu ow myghtern bythkweth,

ow kul selwyans a-berth y'n norvys.

13Ty a rannas an mor dre dha nerth;

ty a dorras pennow an dragones y'n dowrow.

14Ty a derris pennow Lawethan dhe demmyn;

ha'y ri avel boes dhe'n bobel trigys y'n difeyth.

15Ty a folsas an fenten ha'n fros;

ty a dhesyghas avonyow prest ow resek.

16Ty a bew an jydh, dhiso jy ynwedh yw an nos;

ty re bareusis an golow ha'n howl.

17Ty re settyas oll oryon an nor;

ty re wrug hav ha gwav.

18Porth kov a hemma, fatell wrug an eskar ges, A Arloedh,

ha fatell dhispresyas pobel foll dha hanow.

19Na ro enev dha durenn dhe'n goedhviles;

na ankov bewnans dha voghosogyon bys vykken.

20Gwra vri a'n kevambos,

rag tylleryow tewl an nor yw leun a annedhow garowder.

21Na dhehweles an den truan yn disenor;

gormeles an boghosek ha'n edhommek dha hanow.

22Sav, A Dhuw, pled dha gen;

porth kov a'n despit gwrys dhis gans an foll oll an jydh.

23Na ankov lev dha eskerens,

tros an re a sev er dha bynn a voghha pub eur oll.