Dhe vester an keur: Al Tashheth. Salm a Asaf. Kan.

1Ni a woer gras dhis, A Dhuw, ni a woer gras;

ogas yw dha hanow.

Tus a dheriv dha varthusyon.

2‘Y'n prys apoyntys

my a vreus gans ewnder.

3An nor a deudh ha myns eus trigys ynno;

my yw neb a fast y golovenyow.’ Sela.

4My a leveris dhe'n re woethus, ‘Na vostyewgh’,

ha dhe'n debeles, ‘Na dhrehevewgh agas korn.

5Na dhrehevewgh agas korn mar ughel,

ha na gewsewgh howtyn dha gonna.’

6Rag nyns yw dhiworth an howldrevel na dhiworth an worlewin,

na dhiworth an difeyth, y teu eksaltyans.

7Mes Duw yw an breusyas;

ev a iselha unn den hag ughelhe den arall.

8Rag yn leuv an Arloedh yma hanaf,

hag ewynek yw an gwin, kemmyskys yn leun,

hag ev a dhinwa anodho.

Mes an godhes anodho, oll tebeles an nor

a'n lenk ha'y eva.

9Mes my a'n deriv bynitha,

ha kana gormola dhe Dhuw Yakob.

10Oll kern an debeles a droghav dhe-ves,

ha kern an re wiryon a vydh ughelhes.