Dhe vester an keur: gans daffar kerdyn. Salm a Asaf. Kan.

1Aswonnys yw Duw yn Yuda,

meur yw y hanow yn Ysrael.

2Yn Salem yma y skovva,

ha'y drigva yn Sion.

3Ena y torras ev sethow an warak,

an skoes ha'n kledha hag arvow bresel. Sela.

4Splanna osta ha kreffa

ages an menydhyow heb diwedh.

5An re golonnek o pyllys;

i a goedhas yn kosk;

ny wodhya nagonan a'n vreselyoryon

gul devnydh a'y dhiwleuv.

6Orth dha geredh, A Dhuw Yakob,

an charett ha'n margh a goedhas yn kosk poes.

7Ty, ty yw euthyk;

ha piw a sev a-dheragos

pan osta serrys?

8Ty a wrug dhe'th vreus bos klewys dhiworth nev;

an nor a grenas, ha spavennhe,

9pan sevis Duw dhe vreus,

dhe selwel oll an re hwar usi y'n nor. Sela.

10Sorr mab-den a dreyl dhe'th wormola;

remenant an sorr ty a wisk a-dro dhis avel grogys.

11Gwrewgh ambos dhe'n Arloedh agas Duw, ha'y gollenwel;

oll an re usi yn y gyrghynn, drens i rohow

dhe neb a dal perthi own anodho.

12Ev a fronn an spyrys a bennsevigyon;

euthyk yw ev orth myghternedh an nor.