Dhe vester an keur: war Yeduthun. Salm a Asaf.

1My a elwis war Dhuw gans ow lev,

war Dhuw y helwis gans ow lev, hag ev a ros skovarn dhymm.

2Yn dydh ow anken my a hwilas an Arloedh;

ow leuv o ystynnys y'n nos, ha nyns o skwith;

ow enev a skonyas a gavoes hebaska.

3My a berth kov a Dhuw, ha moredhek ov vy;

my a breder yn town, ha'm enev a glamder. Sela.

4Ty a syns ow dewlagas yn tifunys;

mar droblys ov vy ma na allav kewsel.

5My re brederis a'n dydhyow koth,

a'n blydhynyow usi tremenys seuladhydh.

6My a berth kov a'm kan y'n nos;

my a gews gans ow holonn, ha'm enev a hwila dihwans:

7‘A wra an Arloedh skonya bynitha,

hag a ny vydh ev pes da nevra namoy?

8A hedhis y dregeredh bynitha?

A fyll y ambos a unn henedh hwila dihwans dhe'n nessa?

9A ankovas Duw bos grassyes?

A dhegeas ev y druedh yn sorr?’ Sela.

10Ha my a leveris, ‘Hemm yw duwon dymm,

leuv dhyghow an Ughella dhe vos treylys.’

11My a berth kov a wriansow an Arloedh;

devri, my a berth kov a'th varthusyon kyns.

12My a breder ynwedh a'th oberow oll,

ha my a gews a'th wriansow.

13Dha fordh, A Dhuw, yw sans.

Pana dhuw yw meur avel agan Duw ni?

14Ty yw an Duw a wra marthusyon;

ty re dherivas dha nerth yn mysk an bobel,

15Gans dha vregh ty re brenas dha bobel,

mebyon Yakob ha Yosep. Sela.

16An dowrow a'th welas, A Dhuw,

an dowrow a'th welas hag a borthas own;

an downderyow ynwedh a grenas.

17An kommol a dhiveris dowr,

an nevow a wrug tros;

dha sethow ynwedh a lughesis a-les.

18Lev dha daran esa y'n korwyns;

an lughes a wolowis an norvys;

an nor a dhegrenas ha krysya.

19Yma dha fordh y'n mor,

ha'th hynsyow y'n dowrow meur;

ha nyns yw olow dha dreys aswonnys.

20Ty a hembronk dha bobel avel deves

dre leuv Moyses hag Aron.