Maskil a Asaf.

1Goslowewgh orth ow lagha, ow fobel;

plegyewgh agas skovarn dhe lavarow ow ganow.

2My a iger ow ganow yn parabolenn,

my a lever lavarow tewl a'n termyn koth;

3an re a glewsyn hag a wodhven,

hag a dherivas agan tasow dhyn ni.

4Ny's kelyn rag aga fleghes,

ow terivas dhe'n henedh a dheu

gormola an Arloedh,

y nerth ha'y varthusyon a wrug ev.

5Rag ev a fastyas dustuni yn Yakob,

hag a ros lagha dhe Ysrael

a worhemmynnis dh'agan tasow,

ma's deriffens orth aga fleghes;

6ma's godhve an henedh a dho,

an fleghes a vedha genys,

rag may saffens ha'ga derivas dh'aga fleghes.

7Rag may hworrens aga threst yn Duw

ha ma nag ankoffens gwriansow Duw,

mes gwitha y worhemmynnow;

8Ha ma na vens avel aga thasow,

henedh gorth ha dislen;

henedh na veu fyrv aga holonn,

ha nag esa aga spyrys len gans Duw.

9Kepar ha mebyon Efraym, ervys hag ow toen gwaregow,

neb a dreylyas aga heynow yn dydh an gas.

10Ny synsons kevambos Duw,

mes i a skonyas a gerdhes yn y lagha ev;

11Owth ankevi y wriansow ev,

ha'y varthusyon a dhiskwedhsa orta.

12Taklow marthys a wrug ev yn golok agan tasow

yn pow Ejyp, yn gwel Soan.

13Ev a rannas an mor, hag a wrug dhedha tremena dredho;

ev a wrug dhe'n dowrow sevel kepar ha graghell.

14Ha dydhweyth ev a's hembronkas gans kommolenn,

ha dres an nos gans golow tan.

15Ev a folsas an karregi y'n difeyth,

hag a ros diwes dhedha, kepar ha pan dheffa yn-mes a dhownderyow meur.

16Ev a dhros frosow yn-mes a'n garrek

hag a wrug dhe dhowrow dewraga kepar hag avonyow.

17Byttegyns i a beghas dhe voy er y bynn,

ha serri an Ughella y'n difeyth.

18I a brovas Duw yn aga holonn,

ow kovynn boes rag aga ewl.

19Hag i a gewsis erbynn Duw, ow leverel,

‘A yll Duw pareusi moes y'n difeyth?

20Otta, ev a weskis an garrek may tewragas an dowrow,

ha'n frosow a fennas.

Mes a yll ev ri bara ynwedh,

po darbari kig dh'y bobel?’

21Ytho an Arloedh a glewas hemma, hag a sorras;

tan o enowys yn Yakob,

ha konnar a sordyas erbynn Ysrael,

22drefenn na gryssons yn Duw

na fydhya yn y selwyans ev.

23Ytho ev a worhemmynnis dhe'n kommol a-vann

hag igeri darasow nev;

24hag ev a asas manna dhe goedha warnedha avel glaw, ma'n depprens,

hag a ros dhedha ys an nevow.

25Ytho tus a dhybris bara eledh;

ev a dhannvonas dhedha lanwes a voes.

26Ev a wrug dhe wyns an howldrevel hwytha y'n nevow,

ha der y nerth ev a dhros gwyns an dyghow.

27Ev a wrug dhe gig koedha warnedha avel doust,

hag ydhyn askellek kepar ha tewes an mor.

28Hag ev a asas dhedha koedha yn mysk aga thyldow,

a-dro dh'aga annedhow.

29Ytho i a dhybris hag y fons lenwys yn ta,

rag ev a ros dhedha an pyth a yeunsons.

30Mes kyns i dhe gavoes lowr a'n pyth a yeunsons,

ha'n boes hwath yn aga ganow,

31konnar Duw a dheuth warnedha,

ha ladha an re vrassa anedha,

ha gul dhe flour Ysrael koedha.

32Yn despit dhe oll hemma, i a beghas hwath,

ha ny gryssons yn y varthusyon ev.

33Rakhenna ev a wrug dh'aga dydhyow tremena yn euveredh

ha'ga blydhynyow yn euth.

34Pan y's ladhas, i a'n hwilas;

hag i a dreylyas ha hwilas Duw dihwans.

35Hag i a borthas kov Duw dhe vos aga harrek,

ha Duw Ughella dhe vos aga dasprenyas.

36Byttegyns i a'n feklas gans aga ganow,

hag a wowleveris dhodho gans aga thaves

37Rag nyns o aga holonn fast ganso,

ha nyns ens i len yn y gevambos.

38Mes ev, leun a druedh,

a avas aga hammweyth

ha ny's distruis.

Ha lieskweyth ev a dreylyas dhe-ves y sorr

ha ny wrug dhe oll y gonnar difuna.

39Rag ev a borthas kov i dhe vos kig,

gwyns a dremen, ha ny dhehwel.

40Ass wrussons i sevel lieskweyth er y bynn y'n difeyth

ha grevya dhodho y'n gwylvos!

41I a dreylyas, ha previ Duw yn aga holonn,

ha paynya an Sans a Ysrael.

42Ny borthsons kov a'y leuv,

nag a'n jydh ma's dasprenas dhiworth an eskar;

43Fatell wrussa ev y doknys yn Ejyp,

ha'y varthusyon yn gwel Soan.

44Ev a dreylyas aga goverow dhe woes,

ha'ga frosow, ma nag effens anedha.

45Ev a dhannvonas hesow a gelyon yn aga mysk, a's devoryas,

ha kwilkynyow, a's distruis.

46Ev a ros aga threvasow dhe'n pryv,

ha'ga lavur dhe'n lokust.

47Ev a dhistruis aga gwinbrennyer gans keser,

ha'ga sykaminwydh gans rew.

48Ev a asas aga gwarthek dhe'n keser,

ha'ga flokkys dhe'n lughes.

49Ev a dhellos warnedha y sorr fers,

sorr, ha koler, hag anken,

ha dannvon tebel eledh yn aga mysk.

50Ev a dharbaris hyns dh'y sorr,

ha ny withas aga enev rag ankow,

mes ev a ros aga bewnans dhe'n pla;

51Hag ev a weskis pub kynsa-genys yn Ejyp,

kynsa frut aga nerth yn tyldow Ham.

52Mes y bobel y honan, ev a's dros yn-mes avel deves,

ha'ga ledya y'n difeyth avel flokk.

53Ev a's ledyas yn sawder, ma nag ownsons;

mes an mor a gudhas aga eskerens.

54Ev a's dros dhe or y sentri,

dhe'n menydh a brenas gans y leuv dhyghow.

55Hag ev a bellhas an kenedhlow a-dheragdha,

hag a's rannas dhedha yn ertach,

ha gul dhe loethow Ysrael triga yn aga thyldow i.

56Mes i a brovas hag a sorras Duw Ughella,

ha ny synsons y dhustuniow;

57Mes i a gildennas hag omdhegi yn fals avel aga thasow;

i a dreylyas a-denewen avel gwarak lows.

58Rag i a'n sorras gans aga thylleryow ughel,

hag a wrug dh'y avi sevel der aga imajys gravys.

59Pan glewas Duw hemma, serrys veu,

hag ev a dhispresyas Ysrael yn feur.

60Ytho ev a forsakyas an tabernakel yn Shilo,

an tylda a worrsa yn mysk mab-den.

61Ev a dhelivras y nerth dhe gethneth,

y wolewder dhe leuv an eskar.

62Hag ev a ros y bobel dhe'n kledha,

hag a sorras orth y ertach.

63Tan a dhybris aga thus yowynk,

ha ny veu aga maghtethyon res yn demmedhyans.

64Aga oferysi a veu ledhys gans an kledha,

ha ny gynis aga gwedhwesow.

65Ytho an Arloedh a dhifunas avel onan ow sevel yn-mes a gosk,

kepar ha breselyas ow karma wosa gwin.

66Ev a weskis y eskerens war-tu delergh,

hag a ros disenor dhedha bynitha.

67Ev a skonyas tylda Yosep,

ha ny dhewisas loeth Efraym;

68Mes ev a dhewisas loeth Yuda,

menydh Sion, a gara.

69Hag ena ev a dhrehevis y sentri mar ughel avel an nevow,

avel an nor re fastyas bynitha.

70Hag ev a dhewisas Davydh y was

hag a'n kemmeras yn-mes a gorlannow an deves.

71Ev a'n dros dhiworth an deves esa ow tena,

dhe vaga Yakob y bobel

hag Ysrael y ertach.

72Ytho ev a's gwithas gans kolonn lan;

hag ev a's bugelyas herwydh sleyghneth y dhiwleuv.