Salm a Asaf.

1A Dhuw, an kenedhlow re dheuth y'th ertach;

i re dhefolas dha dempel sans,

ha gorra Yerusalem yn bern a vagoryow.

2I re ros korfow dha wesyon

avel boes dhe ydhyn an nevow,

ha kig dha syns dhe vestes an nor.

3I re skoellyas aga goes avel dowr

a-dro dhe Yerusalem,

ha nyns esa denvyth a's ynkleutthya.

4Ni re dheuth ha bos mewl dh'agan kentrevogyon,

skorn ha ges dhe'n re usi yn agan kyrghynn.

5Pygemmys prys, A Arloedh? A vydhydh serrys bynitha?

A lesk dha avi avel tan?

6Dyllo dha gonnar war an kenedhlow

na'th aswonnis,

ha war an gwlaskordhow

na elwis war dha hanow.

7Rag i re dhevoryas Yakob

ha ravna y annedh.

8Na borth kov a gammweythresow agan hendasow;

des dha druedh dhyn ni yn skon,

rag gyllys pur isel on ni.

9Gweres dhyn ni, A Dhuw agan selwyans,

a-barth golewder dha hanow;

gwra agan delivra, ha kudh agan peghosow,

a-barth dha hanow.

10Prag y lever an kenedhlow,

‘Ple'ma aga Duw?’

Bedhes diskwedhys dhe'n kenedhlow yn agan golok ni

dial rag an goes skoellys a'th wesyon.

11Des kynvann an prisner a-dheragos;

herwydh meuredh dha nerth, gwith an re dampnys dhe'n mernans.

12Daskorr seythplek dhe askra agan kentrevogyon

rag an skorn ma'th skornsons jy, A Arloedh.

13Ytho ni, dha bobel ha deves dha beurva,

a woer gras dhis bynitha;

ni a dheriv dha wormola a unn henedh dhe'n nessa.