Dhe vester an keur: war Shoshannim. Dustuni a Asaf. Salm.

1Goslow, A vugel Ysrael,

ty neb a hembronk Yosep avel flokk;

omdhiskwa, ty neb a drig ynter an cherubim.

2A-dherag Efraym ha Benyamin ha Manasse,

difun dha nerth,

ha deus dh'agan selwel.

3Treyl ni arta, a Dhuw;

gwra dhe'th fas golowi, ha ni a vydh selwys.

4A Arloedh Duw an luyow,

pygemmys prys y serrydh orth pysadow dha bobel?

5Ty re's magas gans bara dagrow,

ty re ros dagrow dhedha dhe eva dres musur.

6Ty a'gan gwra strif dh'agan kentrevogyon,

ha'gan eskerens a wra ges ahanan.

7Treyl ni arta, A Dhuw an luyow;

gwra dhe'th fas golowi, ha ni a vydh selwys.

8Ty a dhros gwinbrenn yn-mes a Ejyp;

ty a dewlis dhe-ves an kenedhlow, ha'y blansa ev.

9Ty a bareusis an dor ragdho,

hag ev a wreydhyas yn town ha lenwel an tir.

10An menydhyow o kudhys gans y skeus,

ha kederwydh Duw gans y skorrennow.

11Ev a dhellos y skorr bys y'n mor,

ha'y skyll bys y'n avon.

12Ytho prag y terrsys y geow,

may kemmer oll an dremenysi y rappys?

13Torgh an koes a'n raven,

ha bestes an gwel a beur warnodho.

14Treyl arta, ni a'th pys, A Dhuw an luyow,

mir war-woeles dhiworth nev ha gwel,

ha gwra vri a'n gwinbrenn ma;

15an winlann a blansas dha leuv dhyghow,

ha'n skorrenn a wrussys mar grev ragos jy dha honan.

16Leskys yw gans tan, ha treghys yw;

i a dhe goll orth keredh dha fas.

17Bedhes dha leuv war wour dha leuv dhyghow,

war vab an den a wrussys mar grev ragos jy dha honan.

18Ytho ny dreylyn ni dhiworthis arta;

bewha ni, ha ni a elow war dha hanow.

19Treyl ni arta, A Arloedh, Duw an luyow;

gwra dhe'th fas golowi, ha ni a vydh selwys.