Dhe vester an keur: war an Gittith. A Asaf.

1Kenewgh yn lowen dhe Dhuw agan nerth;

gwra tros heudhik dhe Dhuw Yakob.

2Gwrewgh dhe'n menestrouthi seni, gweskewgh an tabourik,

an sowtri hweg gans an telynn.

3Hwythewgh an trompa y'n loer nowydh,

y'n loer leun, yn agan dy'goel.

4Rag hemm yw ordenans dhe Ysrael,

ha lagha a Dhuw Yakob.

5Ev a erghis hemma yn Yosep rag dustuni,

pan dheuth yn-mes a bow Ejyp.

My a glew yeth na wrav hy godhvos ow leverel,

6‘My a dhifresas y skoedh a'n begh;

y dhiwleuv a veu delivrys dhiworth an ganstell.

7Ty a elwis yn anken ha my a'th telivras;

my a worthybis dhis yn keladow an daran;

my a'th provas orth dowrow Meriba. Sela.

8Klew, ow fobel, ha my a dheg dustuni dhis;

A Ysrael, unnweyth a koslewes orthiv!

9Ny vydh ynnos duw astranj,

ha ny wordhydh duw estren.

10My yw an Arloedh dha Dhuw,

a'th tug jy yn-mes a bow Ejyp.

Igor dha anow a-les, ha my a'n lenow.

11‘Mes ny woslowas ow fobel orth ow lev,

hag Ysrael a'm skonyas.

12Ytho my a's gasas dh'aga holonn worth,

dhe gerdhes herwydh aga husulyow aga honan.

13Unnweyth a koslowa ow fobel orthiv,

hag Ysrael kerdhes yn ow fordhow vy!

14Ena my a fethsa aga eskerens yn skon,

ha treylya ow leuv erbynn aga envi.

15An re a gas an Arloedh a omwrussa gostydh dhodho,

ha'ga thermyn a via bys vykken.

16Ha my a'th vagsa gans gwaneth a'n gwella,

ha gans mel dhiworth an garrek my a'th lanwsa.’