Pysadow a Davydh.

1Pleg dha skovarn yn-nans, A Arloedh, ha gorthyp dhymm,

rag boghosek ov vy hag edhommek.

2Gwith ow enev, rag len ov vy;

salw dha was, ow Duw, a drest ynnos.

3Bydh grassyes orthiv, A Arloedh,

rag warnas y halwav oll an jydh.

4Lowenha enev dha was,

rag dhiso jy, A Arloedh, y trehavav ow enev.

5Rag ty, A Arloedh, yw kuv ha parys dhe ava,

meur dha dregeredh orth oll an re a elow warnas.

6Ro skovarn, A Arloedh, dhe'm pysadow,

ha goslow dhe lev ow govynnadow.

7Yn dydh ow anken y halwav warnas,

rag ty a worthyp dhymm.

8Yn mysk an duwow nyns eus nagonan kepar ha ty, A Arloedh,

ha nyns eus gwriansow kepar ha'th wriansow jy.

9Oll an kenedhlow a wrussys a dheu

hag omblegya a-dheragos, A Arloedh,

ha gordhya dha hanow.

10Rag meur osta, ha ty a wra marthusyon;

ty unnsel yw Duw.

11Dysk dhymm dha fordh, A Arloedh,

ha my a gerdh y'th wirder;

lowenhes ow holonn, mayth ownniv dha hanow.

12My a'th wormel, A Arloedh ow Duw, a leun golonn,

ha my a wordh dha hanow bys vykken.

13Rag meur yw dha dregeredh orthiv;

ty re dhelivras ow enev dhiworth ifarn isella.

14A Dhuw, an re woethus re sevis er ow fynn,

ha kuntellesow an dus fell re hwilas ow enev,

ha ny'th worrsons a-dheragdha.

15Mes ty, A Arloedh, yw Duw truedhek ha grassyes,

lent ow serri, ha meur dha dregeredh ha'th wirder.

16Treyl dhymmo vy, ha bydh grassyes orthiv;

ro dha nerth dhe'th was,

ha salw mab dha vaghteth.

17Diskwa dhymm tokyn a'th tader,

ma'n gwello an re a'm kas, ha perthi meth,

rag ty, A Arloedh, re weresas dhymm, ha'm hebaskhe.