Kan. Salm a vebyon Koragh. Dhe vester an keur: war Mahalath Leannoth. Maskil a Heman an Esrahyas.

1A Arloedh Duw ow selwyans,

my re armas dydh ha nos a-dheragos.

2Des ow fysadow a-dheragos;

pleg dha skovarn dhe'm kri.

3Rag leun yw ow enev a boenvos,

ha'm enev a dheu nes dhe ifarn.

4Reknys ov vy yn mysk an re a dhiyskynn dhe'n pytt;

yth ov vy kepar ha gour heb nerth,

5gesys yn mysk an re varow,

kepar ha'n re ledhys neb a wrowedh y'n bedh,

na berthydh kov anedha namoy,

ha diberthys yns i dhiworth dha leuv.

6Ty re'm gorras y'n pytt isella,

yn tylleryow tewl, hag yn downderyow.

7Dha gonnar yw poes warnav,

ha ty re dhros warnav oll dha donnow. Sela.

8Ty re bellhas dhiworthiv oll an re aswonnys genev;

ty re'm gwrug kasadow dhedha.

Prisonys yn fast ov vy, ma na allav diank;

9ow lagas a fyll dre dhuwon.

A Arloedh, my a elwis warnas pub dydh,

my re ystynnas ow diwleuv dhis.

10A dhiskwedhydh marthusyon dhe'n re varow?

A dhassergh spyrysyon an re varow dhe'th wormel? Sela.

11A vydh dha dregeredh disklerys y'n bedh,

po dha lelder yn Abaddon?

12A vydh dha varthusyon aswonnys y'n tewolgow,

ha'th ewnder yn tir ankov?

13Mes my a gri dhis rag gweres, A Arloedh;

hag y'n myttin y teu ow fysadow a-dheragos.

14Prag, A Arloedh, y skonydh ow enev?

Prag y kudhydh dha fas ragov?

15Truan veuv ha parys dhe verwel dhiworth ow yowynkneth;

my re borthas own ahanas, hag yn desper ov vy.

16Dha gonnar res eth dresov;

own ahanas re'm distruis.

17I a dheuth a-dro dhymm oll an jydh avel dowr;

i a omsettyas a-dro dhymm a bub tu.

18Karer ha koweth a bellhasys dhiworthiv,

hag yma ow aswonnesigyon yn tewlder.