Maskil a Ethan an Esrahyas.

1My a gan a dregeredhow an Arloedh bynitha;

gans ow ganow y terivav dha lelder a unn henedh dhe'n nessa.

2Rag my re leveris, bos tregeredh drehevys bynitha;

dha lelder a fastydh y'n nevow.

3‘My re wrug kevambos gans an den dewisys genev,

my re dos dhe Davydh ow gwas:

4“Dha has a fastyav bynitha,

ha'th se a dhrehavav a unn henedh dhe'n nessa.” ’ Sela.

5Ha'n nevow a wormel dha varthusyon, A Arloedh,

dha lelder ynwedh yn kuntelles an syns.

6Rag piw y'n nevow a yll bos kehaval dhe'n Arloedh?

Piw yn mysk mebyon an duwow a yll bos haval dhe'n Arloedh?

7Ownys yw Duw yn kuntelles an syns;

pur euthyk a-ugh oll an re usi yn y gyrghynn.

8A Arloedh, Duw an luyow,

piw yw galloesek avelos jy, A Arloedh?

Yma dha lelder a-dro dhis.

9Ty a rewl hwythfians an mor.

Pan sev y donnow, ty a's koselha.

10Ty re vrewis Rahab dhe eneworres;

ty re skattras dha eskerens gans nerth dha vregh.

11Yma an nevow dhiso jy, yma an nor ynwedh dhiso jy;

an norvys ha pup-tra eus ynno, ty re's selyas.

12An kledh ha'n dyghow, ty re's formyas;

Tabor ha Hermon a gri yn lowen y'th hanow.

13Yma dhis bregh alloesek;

nerthek yw dha leuv, hag ughel yw dha leuv dhyghow.

14Ewnder ha gwirvreus yw sel dha se;

tregeredh ha gwirder a a-dherag dha fas.

15Gwynnvys an bobel a aswonn an arm heudhik,

neb a gerdh, A Arloedh, yn golow dha fas.

16I a lowenha y'th hanow oll an jydh,

hag y'th ewnder y fydhons ughelhes.

17Rag ty yw glori aga nerth,

hag y'th vodh da y trehevydh agan korn.

18Rag an Arloedh Duw yw agan skoes,

ha Sans Ysrael yw agan Myghtern.

19Yn termyn passys y kewssys orth dha syns yn gwelesigeth, ha leverel:

‘My re worras gweres war onan galloesek;

my re dhrehevis onan dewisys yn-mes a'n bobel.

20My re gavas Davydh ow gwas;

gans ow oyl sans my re'n untyas.

21Ow leuv a'n menten,

ha'm bregh ynwedh a'n krevha.

22Ny drygh an eskar warnodho,

ha ny'n pystik mab sherewneth.

23Ha my a vrew y eskerens a-dheragdho

ha'n re a'n kas my a's gwysk.

24Mes ow lelder ha'm tregeredh a vydh ganso;

hag y'm hanow vy y fydh y gorn ughelhes.

25Ha my a sett y leuv y'n mor

ha'y leuv dhyghow y'n avonyow.

26Ev a elow warnav, “Ow thas osta jy,

ow Duw, ha karrek ow selwyans.”

27Ha my a'n gwra ow hynsa-genys,

an ughella a vyghternedh an nor.

28My a with ow thregeredh orto bynitha,

ha'm kevambos ganso a sev fast.

29My a wra dh'y has durya bys vykken,

ha'y se avel dydhyow nev.

30Mar kwra y fleghes gasa ow lagha

ha mar ny gerdhons y'm breusow,

31mar terrons ow ordenansow

ha ny synsons ow gorhemmynnow,

32ena my a gessydh aga threuspass gans an welenn

ha'ga hammweyth gans strokosow.

33Mes ny gemmerav ow thregeredh dhiworto,

ha ny vydhav fals dhe'm lelder.

34Ny dorrav ow hevambos,

ha ny dreylyav an ger a dheuth yn-mes a'm diwweus.

35Unnweyth re des vy re'm sansoleth;

ny wowlavarav orth Davydh.

36Y has a dhur bys vykken,

ha'y se a vydh avel an howl a-dheragov.

37Ev a vydh fastys avel an loer bynitha,

hag avel dustuni len y'n nevow.’ Sela.

38Mes ty re dewlis dhe-ves ha skonya;

ty re sorras orth dha Untys.

39Ty re skonyas an kevambos gans dha was;

ty re dhefolas y gurun, orth hy thewlel dhe'n dor.

40Ty re dorras oll y geow ev;

ty re wrug y dhinasow magoryow.

41Oll an dremenysi a'n pyll;

ev a dheuth ha bos skorn dh'y gentrevogyon.

42Ty re dhrehevis leuv dhyghow y envi;

ty re lowenhas oll y eskerens.

43Ty re dreylyas min y gledha,

ha ny'n gessys dhe sevel y'n gas.

44Ty re dorras an welenn yn-mes a'y leuv,

ha tewlel y se dhe'n dor.

45Ty re verrhas dydhyow y yowynkneth;

ty re'n kudhas gans meth. Sela.

46Pygemmys prys, A Arloedh? A omgudhydh jy bynitha?

A lesk dha sorr avel tan?

47Porth kov, A Arloedh, ass yw kott ow bewnans;

a formsys oll mebyon den yn euver?

48Py gour a vew heb gweles ankow?

A yll ev delivra y enev dhiworth leuv ifarn? Sela.

49Ple'ma dha dregeredhow koth, A Arloedh,

an re a desys dhe Davydh y'th lelder?

50Porth kov, A Arloedh, a vewl dha wesyon,

fatell borthav y'm askra despit an poblow;

51An despit ganso may skornyas dha eskerens, A Arloedh,

may skornsons olow dha Untys.

52Benniges re bo an Arloedh bys vykken ha bynnari.

Amen hag Amen.