Salm. Kan rag dydh an Sabot.

1Da yw grassa dhe'n Arloedh,

ha kana gormola dhe'th hanow, an Ughella,92:1 an Ughella: Ebrow Elyon.

2ow terivas dha dregeredh myttinweyth,

ha'th lelder nosweyth,

3War dhaffar a dheg kordenn ha war an telynn,

war an sowtri hweg hy thon.

4Rag ty, A Arloedh, re'm heudhhas dre dha wriansow,

orth ober dha dhiwleuv my a arm yn lowen.

5A Arloedh, ass yw meur dha oberow!

Pur dhown yw dha brederow.

6Ny woer gour talsogh,

ha ny gonvedh den foll hemma.

7Pan las an debeles avel an gwels,

ha pan sewen oll an dhrogoberoryon,

ena y fydhons diswrys bynnari;

8mes yth esos yn ughelder bys vykken, A Arloedh.

9Rag otta, dha eskerens, A Arloedh,

otta, dha eskerens a dhe goll,

ha diberthys vydh oll an dhrogoberoryon.

10Mes ty re ughelhas ow horn avel korn an ojyon gwyls;

ty re'm untyas gans oyl yr.

11Ow lagas ynwedh a wel ow mynnas war ow eskerens;

ha'm diwskovarn a glew ow mynnas a'n debeles a sev er ow fynn.

12An den gwiryon a las avel an balmwydhenn,

hag ev a dyv avel kederwydhenn yn Lebanon.

13An re yw plynsys yn chi an Arloedh,

a las yn klosyow agan Duw.

14I a dheg frut hwath yn aga hothni,

hag y fydhons yr ha glas,

15rag may teriffons an Arloedh dhe vos ewnhynsek;

ow harrek yw ev, ha nyns eus kammhynseth ynno.