1A Arloedh, ty Dhuw a dhial,

ty Dhuw a dhial, omdhiskwa.

2Sav, ty vreusyas an norvys;

attal aga gober dhe'n re woethus.

3A Arloedh, pygemmys prys y hwra an debeles,

pygemmys prys y hwra an debeles tryghi?

4Pygemmys prys y klapp, ha kewsel yn hwoethus,

ha bostya oll an dhrogoberoryon?

5I a vrew dha bobel, A Arloedh,

ha grevya dhe'th ertach.

6I a ladh an wedhwes ha'n alyon,

ha moldra an re omdhivas.

7Mes i a lever, ‘Ny wel an Arloedh,

ha ny wra Duw Yakob vri anodho.’

8Ombreder, hwi anfur yn mysk an bobel;

ha hwi an re dalsogh, p'eur fydhowgh fur?

9Neb a blansas an skovarn, a ny glew?

Ha neb a formyas an lagas, a ny wel?

10Po neb a geredh an kenedhlow,

a ny gesk?

Ev neb a dhysk godhvos dhe vab-den,

a ny woer?94:10 a ny woer: Amendys. Ebrow godhvos.

11An Arloedh a woer prederow den,

aga bos euveredh.

12Gwynnvys an gour a geredhydh, A Arloedh,

ha dyski dhodho yn-mes a'th lagha,

13rag may rylli dhodho powesva dhiworth dydhyow anken,

erna vo an pytt kleudhys rag an tebelwas.

14Drefenn na as an Arloedh y bobel;

ha ny forsak y ertach.

15Rag gwirvreus a dhehwel dhe wiryonedh,

hag oll an re ewnhynsek aga holonn a hol war hy lergh.

16Piw a omdhrehav ragov erbynn an debeles?

Piw a sev ragov erbynn an dhrogoberoryon?

17Na ve an Arloedh ow gweres,

nammna drigsa ow enev yn taw.

18Pan leveris vy, ‘Ow throes a drebuch’,

dha dregeredh, A Arloedh, a'm skoedhyas.

19Yn prederow pals a-bervedh ynnov,

dha hebaska a lowenha ow enev.

20Eus kowethyans genes orth se sherewneth,

an re a wra dregynn erbynn an lagha?

21I a omguntell war-barth erbynn enev an den gwiryon,

ha dampnya an goes glan.

22Mes an Arloedh yw ow dinas,

ha'm Duw yw karrek ow skovva.

23Ev a attal dhedha aga sherewneth aga honan,

ha'ga distrui yn aga droktra aga honan;

devri, an Arloedh agan Duw a wra aga hisya.